JPYC şirkəti Yaponiyada yen məzənnəsinə bağlı ilk rəsmi steyblkoinin işə salındığını elan edib. JPYC tokenlərinin emitenti bildirib ki, steyblkoin tam şəkildə milli valyuta depozitləri və Yaponiya dövlət istiqrazları ilə təmin olunacaq.
JPYC avqust ayında Yaponiyada ödəniş xidmətləri provayderi kimi qeydiyyatdan keçib. Steyblkoinin istifadəyə verilməsi ilə yanaşı, şirkət onun buraxılışı və geri alınması üçün xüsusi JPYC EX platformasını da açıb. İstifadəçilər yerli şəxsiyyət vəsiqəsi ilə təsdiqləmədən keçdikdən sonra bu platforma vasitəsilə tokenləri əldə edə bilərlər.
JPYC steyblkoini Avalanche, Ethereum və Polygon blokçeyn şəbəkələrində fəaliyyət göstərir. Emitent üç il ərzində dövriyyəyə 10 trilyon yen (65,4 milyard dollar) dəyərində token buraxmağı hədəfləyir.
