“YouTube” sabit səs səviyyəsini təyin etmək imkanı da daxil olmaqla, yeni funksiyaların istifadəçilər üçün əlçatan olduğu yeniləməni təqdim edib. Xidmət həmçinin dizaynına yeni animasiyalar əlavə edib.
Sabit səs səviyyəsi funksiyası avtomatik olaraq işə salınacaq və lazım olduqda onu video parametrlərinə daxil olaraq söndürə bilərsiniz. Süni intellekt istifadəçiləri qəfil səs dəyişikliklərindən qorumaq üçün bütün videoların səs səviyyəsini bərabərləşdirir.
Digər bir yenilik videonu iki dəfə sürətli sürüşdürmək funksiyasıdır. Bunu etmək üçün ekranda barmağınızı və ya siçan düyməsini basıb saxlamalısınız. Videoda istədiyiniz nöqtəyə çatdıqdan sonra barmağınızı və ya düyməni buraxın.
Ekranı toxunmalardan kilidləmək funksiyası işə salındıqda, smartfon və ya digər cihaz toxunuşları qəbul etməyi dayandırır. Bu yeniliyi tətbiqin parametrlərində aktiv və ya deaktiv etmək mümkündür.
Tətbiqə həmçinin görmə qabiliyyəti zəif olanlara və kor insanlara kömək edəcək müxtəlif dillərdə audiotreklər funksiyası əlavə edilib. Onu aktivləşdirmək üçün “YouTube”da mövcud olan “Altyazılar” bölməsinə daxil olmağınız və müvafiq seçim etməyiniz lazımdır.
Kitabxana və profil parametrləri indi “Siz” bölməsində birləşdirilib. Burada siz baxdığınız və bəyəndiyiniz video və pleylistləri tapa bilərsiniz. Xidmət həmçinin yeni funksiyanı işə salıb ki, onun köməyi ilə istifadəçilər mahnını zümzümə etməklə platformada istənilən musiqi kompozisiyasını tapa biləcəklər.
