“Əgər dəfnə yarpağının xaricə ixrac məsələsi öz həllini taparsa, Azərbaycana valyuta axınını təmin edə bilər”

Ölkəmizin cənub bölgəsində ənənəvi təsərrüfat sahələrindən biri də dəfnəçilik olub. Bu gün isə dəfnə ağacları Lənkəran və Astara rayonlarının bəzi həyətyanı sahələrində yalnız dekorativ bitki kimi yetişdirilir. Dəfnə yarpağına olan tələbatı nəzərə alan astaralı fermerlər bu sahənin əvvəlki şöhrətini qaytarmaq niyyətindədirlər.
AZsasən Əsasən subtropik ərazilərdə yetişdirilən həmişəyaşıl dəfnə bitkisi Azərbaycanda 1930-cu illərdən yayılmağa başlayıb. Lənkəran və Astara rayonlarının ərazisində geniş sahələrdə becərilən dəfnə ağacları genişləndirilərək 200 hektarlarla sahəni əhatə edib.
Bioloq Yunus Qulamoun sözlərinə görə, Astara rayonunun Kijəbə qəsəbəsində, keçmiş Lenin adına sovxozun ərazisində ilk dəfə dəfnə bağları salınıb. Təcrübə yaxşı nəticə verdiyi üçün Lənkəranın bütün kəndlərinə paylanılıb. Dəfnənin becərilməsinin maya dəyəri olduqca azdır. Həm quraqlığa, həm də mənfi 20 dərəcəyə dözümlüdür.
Sovet dövründə dəfnə yarpağından daha çox məişətdə, əsasən də balıqçılıq sənayesində, meyvə-tərəvəz konservlərinin istehsalında geniş istifadə olunub. Hazırda dünyanın əksər ölkələrində dəfnə yarpağı tibbi və kosmetik şirkətlərə yüksək qazanc gətirir. Dəfnə yarpağından bir çox xəstəliklərin müalicəsində – diş iltihabı, daxili xəstəliklərdə, şəkərin, təzyiqin aşağı salınmasında istifadə olunur.
Bir zamanlar insanlara qazanc gətirən dəfnə ağacları həm də həyətyanı sahələrdə əkilməklə çəpər rolunu oynayıb. Digər bir üstün cəhəti də bu ağacın uzunömürlü olmasıdır. Yəni 150-200 il ömür sürür. Bu ağaclar suya da çox tələbkar deyil.
Yerli sakinlər həyətlərindəki dəfnə ağaclarından az da olsa faydalanmağa çalışırlar.
Mütəxəssislərin dediyinə görə, maya dəyəri az və qulluğa bir o qədər ehtiyac duymayan dəfnə ağacları yüksək məhsuldarlığa malikdir. Bir hektar sahədən 20-30 ton yaş, 3-5 ton quru dəfnə yarpağı əldə etmək olur. Əgər tədarük və ixrac məsələsi öz həllini taparsa, qısa müddətdə bu gəlirli sahəni yenidən dirçəltmək mümkündür. Dəfnə yarpağının xaricə ixracı Azərbaycana valyuta axınını da təmin edə bilər. Hazırda dünya bazarında dəfnəyə olan tələbatın 80-90 faizini Türkiyə ödəyir.