Avropa Komissiyası və Ukrayna “makromaliyyə yardımı üzrə qarşılıqlı anlaşma memorandumu” imzalayıblar. Sənəd Kiyevə sonradan 90 milyard avro həcmində kredit ayrılmasını nəzərdə tutur. Bu barədə Avropa komissarı Valdis Dombrovskis məlumat verib.
İlk tranşın iyun ayında ayrılması planlaşdırılır. “Bu dəstək Ukraynanın iqtisadi dayanıqlığını gücləndirəcək, daxili gəlirləri artıracaq və korrupsiyaya qarşı mübarizəni gücləndirəcək”, — deyə diplomat “X” sosial şəbəkəsində yazıb.
Avropa İttifaqı aprelin sonunda Ukraynaya Avropa büdcəsinin zəmanəti altında 90 milyard avro kredit ayrılmasını təsdiqləyib. Bu vəsaitin 60 milyard avrosu hərbi satınalmalara, 30 milyard avrosu isə büdcə dəstəyinə yönəldiləcək. Maliyyə 2026–2027-ci illər üçün nəzərdə tutulub.
Vəsaiti əldə etmək üçün Ukrayna üç sənəd imzalamalıdır. Onlardan biri Ukraynanın öhdəlikləri və islahatları əsasında hazırlanan makromaliyyə yardımı proqramıdır.
