Azərbaycanda ilk investisiya bankı 2019-cu ilədək yaradıla bilər.
Bunu “AzFinance” investisiya şirkətinin direktoru Abid Məmmədov “Azərbaycan kapital bazarları: Gələcəyə baxış” adlı tədbirdə çıxışı zamanı deyib.
“Biz kapital bazarları və onun iştirakçıları ilə işlədikcə görürük ki, investisiya bankının xidmətlərinə daha çox ehtiyac və tələbat var. Ölkə başçısı tərəfindən təsdiqlənən Strateji Yol Xəritəsində də fond bazarlarına xüsusi diqqət ayrılıb. Hesab edirəm ki, ilk investisiya bankının yaradılması fond bazarlarının inkişafına öz töhfəsini verə bilər. Avtomatik olaraq, investisiya xidmətlərinə olan tələbat kəskin artacaq. ”, – deyə o bildirib.
Onun sözlərinə görə, hazırda müştərilər ənənəvi bank xidmətlərindən uzaqlaşmaqdadırlar: “2014-cü ilədək, yəni böhrana qədər insanlar iki növ investisiya alətini nəzərdən keçirirdi: bank depozitlərinə və ya daşınmaz əmlaka yatırım. İndi isə insanların çoxu investisiya şirkətlərinə üz tutur və onların təqdim etdiyi maliyyə alətləri ilə maraqlanır. Göründüyü kimi, insanlar standart investisiyalardan uzaqlaşır. Daşınmaz əmlak bazarında yaşanan bum xeyli sabitləşib. Üstəlik, bankların təqdim etdiyi standart depozitlər insanlar üçün o qədər də maraqlı deyil. Bildiyiniz kimi, əvvəllər banklar dollarda olan depozitlərə görə 12%-dək ödəniş edirdisə, hazırda faiz dərəcələri sərfəli deyil. Bu səbəbdən insanlar bizim təqdim etdiyimiz maliyyə alətlərinə üz tutur və risksiz alətlərə yatırım edir. Hətta borclanma ilə bağlı çətinliklə üzləşən bir çox şirkətlər də bu alətlərə üz tutur. Durum onu göstərir ki, bu tendensiya davamlı olacaq və maliyyə bazarları inkişaf edəcək”.
Şirkət rəhbəri qeyd edib ki, maliyyə bazarlarının inkişafı ölkənin də inkişafına səbəb olacaq.
