“Azərbaycanda dayanıqlılığın və kənd təsərrüfatı məhsullarının ÜDM-də payını artırmaq və ümumilikdə qeyri-neft sektorunu inkişaf etdirmək üçün kənd təsərrüfatı sığortasına ehtiyac var”.
Bunu Bakıda keçirilən 6-cı Sığorta Konfransında Maliyyə Bazarlarına Nəzarət Palatasının baş mütəxəssisi Firdovsi Ağaşirinov deyib.
Onun sözlərinə görə, beynəlxalq təcrübə araşdırılaraq kənd təsərrüfatının sığortası ilə bağlı qanun layihəsi hazırlanaraq Nazirlər Kabinetinə təqdim olunub. “2002-ci ildə Azərbaycanda kənd təsərrüfatı sığortasının stimullaşdırılması ilə bağlı qəbul olunan qanuna görə hər il bu məqsədlə büdcədən 1 milyon manat ayrılır, lakin istifadə olunmadan yenidən büdcəyə qayıdır. 2017-ci ildə kənd təsərrüfatı sahəsində 4 sığortaçı fəaliyyət göstərib ki, onların sığorta yığımları 4,3 milyon manat təşkil edib”.
