2014-cü ilin fevral ayının 1-nə TuranBankın aktivləri 2013-cü ilin analoji dövrü ilə müqayisədə 15,57%, ötən ilin sonu ilə müqayisədə isə 0,23% artaraq 247,421 mln. manat təşkil etmişdir. Hesabat tarixinə bankın kredit portfeli 2013-cü ilin analoji dövrü ilə müqayisədə isə 9,93% artaraq 178,221 mln. manata çatmışdır.
Cari ilin yanvar ayı üzrə Bankın müştəri hesabları və depozit portfeli 108,743 mln. manat təşkil etmişdir. Depozit portfelinin strukturunda fiziki şəxslərin müddətli əmanətləri 2013-cü ilin analoji dövrü ilə müqayisədə 29,77% artaraq 61,925 mln. manat təşkil etmişdir.
1 fevral 2014-cü il tarixinə Bankın nizamnamə kapitalı 44 mln. manat təşkil etməklə ötən ilin müvafiq dövrü ilə müqayisədə 46,67% artmışdır. Hesabat dövründə Bankın məcmu kapitalı ötən ilin sonu ilə müqayisədə 1,14%, ötən ilin analoji dövrü ilə müqayisədə isə 32,92% artaraq 51,065 mln. manat təşkil etmişdir.
Bankın nizamnamə kapitalının strukturu ümumilikdə 28 səhmdar olmaqla – 6 hüquqi (29,11%) və 22 fiziki şəxsdən (70,89%) ibarətdir. Ötən ilin sonu TuranBankın səhmlərin 3028 ədədini əldə edən ABŞ-da idarə olunan ShoreCap II Ltd. Fondu 7,45% payla Bankın səhmdarları sırasına qatılmışdır. Bankın yeni səhmdarının əsas fəaliyyəti Asiya və Afrika qitələrində inkişaf etməkdə olan ölkələrdə fəaliyyət göstərən banklara, mikro maliyyə institutlarına və qeyri-bank maliyyə təşkilatlarına investisiya qoyuluşlarıdır.
2014-cü ilin yanvar ayı üzrə fəaliyyət nəticələrinə əsasən Bankın gəlirləri 2,434 mln. manat, xərcləri isə 1,851 mln. manat təşkil etmişdir. Hesabat dövrü ərzində Bankın balans mənfəəti 583 min manat olmuşdur.
