Müştərilərin işinin rahatlığını təmin edən Expressbank əməkdaşlarının peşəkarlığı üçün də daima çalışır. Tətbiq etdiyi peşə təlimləri və şəxsi inkişaf proqramları ilə təcrübəçiləri bankın peşəkar komanda üzvünə çevirən Express İnkişaf Mərkəzi cari ilin ilk ayında yeni tədris ocağını istifadəyə verdi. Rəmzi açılış lentini kəsən Expressbank-ın İdarə Heyətinin sədri İlham Həbibullayev çıxış edərək gələcəkdə peşəkar mütəxəssislərin hazırlanmasında Express İnkişaf Mərkəzinin əhəmiyyətindən bəhs etdi:
“İşçilərimizin inkişafına, öz işçi məktəbinin formalaşmasına böyük yer ayıran və dəyər verən bank olaraq belə bir mərkəzin yaradılması barədə müvafiq qərarı qəbul etdik və nəticədə bu gün sizinlə birgə açılışında iştirak edirik. Bir çox hallarda işçinin bankla, onun korporativ mədəniyyəti və dəyərləri ilə tanışlığı məhz təlim tədris mərkəzlərindən başlayır. Çalışdıq ki, mərkəzimiz bu baxımdan öz konsepsiyası və mövcud imkanları ilə işçilərimizin mərkəzdə keçirdiyi vaxta əlavə dəyər artırsın, həm də onlar üçün əlavə motivasiya mənbəyi olsun. Əsas məqsədimiz isə mərkəzə gələn əməkdaşların nəzəri biliklər ilə yanaşı yerində bütün proseslərin canlı şahidi olaraq lazımi praktiki biliklərə tez və keyfiyyətli şəkildə yiyələnməsini təmin edə bilməkdir.”
İnsan Resursları departamentinin rəhbəri Məlahət Abdullayeva bankda çalışan əməkdaşların inkişafı istiqamətində əldə edilən uğurlardan və növbəti ildə nəzərdə tutulan maraqlı layihələrdən, əsas hədəflərdən danışdı.
“Bankda hər bir əməkdaşın inkişafı ümumi komandanın inkişafı və uğuru deməkdir. Express İnkişaf Mərkəzinin əsas hədəfi keyfiyyətli və tədris sahəsində ehtiyacları qarşılayan mərkəzə çevrilməkdir. Bununla da potensialı olan gənclərin bank sahəsində təcrübə əldə edərək gələcəkdə daha böyük uğurlara nail olmalarına zəmin yaratmaqdır. Həmçinin mövcud əməkdaşların da şəxsi və peşəkar inkişafı üçün müxtəlif layihələr nəzərdə tutulub. Digər tərəfdən bankdaxili inkişaf yoluna daha çox üstünlük verdiyimiz üçün qarşıya qoyulan hədəflərdən biri də bankdakı yüksək vəzifələri daxili kadrlarımız hesabına təmin etməkdir.”
Məlahət Abdullayeva vurğuladı ki, ötən il təlim ehtiyaclarından asılı olaraq təşkil edilən 200-ə yaxın fərqli üsullarla keçirilən daxili və kənar təlimlərdən 3000-ə yaxın iştirakçı yararlanmışdır. 2019-cu ildə bu rəqəmin daha da artacağı gözlənilir. Mərkəzdə bundan sonra da təşkil edilən tədbirlərdə nəzərdə tutulan yeni və müasir alternativ tədris vasitələrindən istifadə nəzərdə tutulub. Bu məqsədlə ötən il tədrisə başladığımız bir sıra uğurlu layihələrin davamı olaraq ənənəvi stereotiplərdən uzaqlaşaraq “Oyna və öyrən, öz işinin peşəkarı ol” şüarı altında gamification (oyunlaşdırma) layihəsınə başladıq.
Əlavə olaraq Express İnkişaf Mərkəzində yaradılan böyük kitabxana, əməkdaşların yeni biliklərin əldə etməsinə və bank fəaliyyətində ümumdünya təcrübəsi ilə yaxından tanış olmağa gözəl şərait yaradır.
Qeyd edək ki, yeni Express İnkişaf mərkəzi Əcəmi Naxçıvani 21 yerləşir. Əlavə məlumat üçün 132 məlumat mərkəzinə müraciət edə bilərsiniz.
