“Körpü bankın yaradılması, səhmlərinin buraxılışı və qeydiyyatı, körpü banka bank lisenziyasının verilməsinin xüsusi sadələşdirilmiş proseduru və fəaliyyətinin tənzimlənməsi Qaydaları”nın təsdiq edilməsi barədə

Azərbaycan Respublikasının Maliyyə Bazarlarına Nəzarət Palatası

 QƏRAR

 № 1851100002

 Bakı şəhəri                                                                              “08” oktyabr 2018-ci il

“Körpü bankın yaradılması, səhmlərinin buraxılışı və qeydiyyatı, körpü banka bank lisenziyasının verilməsinin xüsusi sadələşdirilmiş proseduru və fəaliyyətinin tənzimlənməsi Qaydaları”nın təsdiq edilməsi barədə

“Banklar haqqında” Azərbaycan Respublikasının Qanununda dəyişikliklər edilməsi barədə” Azərbaycan Respublikasının 2017-ci il 7 aprel tarixli 569-VQD nömrəli Qanununun tətbiqi və “Banklar haqqında” Azərbaycan Respublikası Qanununun tətbiq edilməsi barədə” Azərbaycan Respublikası Prezidentinin 2004-cü il 26 mart tarixli 42 nömrəli Fərmanında dəyişikliklər edilməsi haqqında” Azərbaycan Respublikası Prezidentinin 2017-ci il 12 aprel tarixli 1336 nömrəli Fərmanının 4-cü hissəsinin icrasını təmin etmək məqsədi ilə və Azərbaycan Respublikası Prezidentinin 2018-ci il 4 oktyabr tarixli 288 nömrəli Fərmanı ilə təsdiq edilmiş “Azərbaycan Respublikasının Maliyyə Bazarlarına Nəzarət Palatasının Nizamnaməsi”nin 4.10.12-ci yarımbəndini rəhbər tutaraq Azərbaycan Respublikasının Maliyyə Bazarlarına Nəzarət Palatasının İdarə Heyəti

Q Ə R A R A  A L I R:

1. “Körpü bankın yaradılması, səhmlərinin buraxılışı və qeydiyyatı, körpü banka bank lisenziyasının verilməsinin xüsusi sadələşdirilmiş proseduru və fəaliyyətinin tənzimlənməsi Qaydaları” təsdiq edilsin (əlavə olunur).
2. Hüquq və icraat departamentinə (Əfqan Baxışov) tapşırılsın ki, bu Qərarın 3 gün müddətində Azərbaycan Respublikasının Hüquqi Aktların Dövlət Reyestrinə daxil edilməsi üçün Ədliyyə Nazirliyinə təqdim edilməsini təmin etsin.

Körpü bankın yaradılması, səhmlərinin buraxılışı və qeydiyyatı, körpü banka bank lisenziyasının verilməsinin xüsusi sadələşdirilmiş proseduru və fəaliyyətinin tənzimlənməsi Qaydaları

1. Ümumi müddəalar

1.1. Bu Qaydalar “Banklar haqqında” Azərbaycan Respublikası Qanununun (bundan sonra – Qanun) 57-8.2-ci və 57-8.3-cü maddələrinə uyğun olaraq hazırlanmış və körpü bankın yaradılması, səhmlərinin buraxılışı və qeydiyyatı, körpü banka bank lisenziyasının verilməsinin xüsusi sadələşdirilmiş proseduru və körpü bankın fəaliyyətinin tənzimlənməsi qaydalarını müəyyən edir.

1.2. Bu Qaydalarda istifadə olunan anlayışlar Qanunda verilən mənaları ifadə edir.

2. Körpü bankın yaradılması və idarə olunması

2.1. Qanunun 57-8.1-ci maddəsinə uyğun olaraq, ödəmə qabiliyyətini itirmiş bir və ya bir neçə bankın aktiv və öhdəliklərinin tam və ya qismən köçürülməsi və onların müvəqqəti idarə edilməsi məqsədilə Azərbaycan Respublikasının Maliyyə Bazarlarına Nəzarət Palatasının (bundan sonra – Palata) İdarə Heyətinin qərarı ilə körpü bank yaradılır.

2.2. Körpü bankın nizamnaməsi Palatanın İdarə Heyəti tərəfindən təsdiqlənir. Körpü bankın nizamnaməsinə uyğun olaraq müəyyən edilən daxili reqlamenti ən azı aşağıdakıları əhatə etməlidir:

2.2.1. körpü bankın təşkilati-strukturu, bölmələri və bölmələrin funksiyaları, tabeliyi və hesabatlıq qaydaları;

2.2.2. körpü bankın fəaliyyətinin daxili auditi qaydaları.

2.3. Körpü bank təşkilati-hüquqi formasına görə açıq səhmdar cəmiyyətidir və yeganə səhmdarı Palata hesab olunur. Körpü bankın adında “körpü bank” sözləri olmalıdır.

2.4. Körpü bankın nizamnamə kapitalı 4000 (dörd min) manat məbləğində olmaqla Palata tərəfindən ödənilir.

2.5. Qanunun 57-8.4-cü maddəsinə uyğun olaraq, körpü bankın idarəetmə orqanının səlahiyyətlərini müvəqqəti inzibatçı həyata keçirir və investora satılana kimi körpü bank müvəqqəti inzibatçı tərəfindən idarə olunur.

2.6. Müvəqqəti inzibatçı aşağıdakı funksiyaları həyata keçirir:

2.6.1. bankın dayanıqlı fəaliyyət göstərməsini təmin edir;

2.6.2. körpü bankın aktivlərinin keyfiyyətinin yaxşılaşdırılması, habelə bankın mənfəətliyinin artırılması istiqamətində tədbirlər görür;

2.6.3. Qanunda müvəqqəti inzibatçı üçün müəyyən edilmiş digər funksiyaları həyata keçirir.

2.7. Qanunun 57-4.2-ci və 57-8.11-ci maddələrinə uyğun olaraq, müvəqqəti inzibatçının fəaliyyətinə aşağıdakı hallarda Palata tərəfindən xitam verilir:

2.7.1. müvəqqəti inzibatçının təyinat müddəti bitdikdə;

2.7.2. Palata tərəfindən müvəqqəti inzibatçının fəaliyyətinə vaxtından əvvəl xitam verildikdə;

2.7.3. körpü bankın məcburi ləğv edilməsinə dair məhkəmə tərəfindən qərar qəbul edildikdə;

2.7.4. körpü bank statusunun itirildiyi gündən 3 (üç) iş günü ərzində Palata müvəqqəti inzibatçının fəaliyyətinə xitam verilməsi barədə qərar qəbul etdikdə.

3. Körpü banka lisenziyanın verilməsi və ləğv edilməsi

3.1. Körpü banka bank lisenziyası aşağıdakı sənədlər əsasında verilir:

3.1.1. körpü bankın yaradılması və müvəqqəti inzibatçının təyin edilməsi haqqında Palatanın İdarə Heyətinin qərarı;

3.1.2. körpü bankın hüquqi şəxs kimi dövlət qeydiyyatına alınması haqqında şəhadətnamənin və nizamnaməsinin surətləri;

3.1.3. bank lisenziyasının verilməsi üçün dövlət rüsumunun ödənildiyini təsdiq edən sənəd.

3.2. Palatanın İdarə Heyəti körpü banka bu Qaydaların 3.1-ci bəndinin tələbləri gözlənilməklə Azərbaycan Respublikasının Prezidenti ilə razılaşdırmaqla lisenziya verir. 

3.3. Bu Qaydaların 3.1.2-ci və 3.1.3-cü yarımbəndlərində müəyyən edilən dövlət rüsumlarının ödənilməsi ödəmə qabiliyyətini itirmiş bankın hesabına həyata keçirilir.

3.4. Körpü bank Qanunun 57-8.13-cü maddəsində nəzərdə tutulmuş müddət ərzində satılmadıqda, bu məqsədlə müəyyən edilən müddətin başa çatmasından ən geci sonrakı gün Palata körpü bankın bank lisenziyasının ləğvi və məcburi ləğvi üçün müvafiq tədbirlər görür.

4. Körpü bankın səhmlərinin buraxılışı və qeydiyyatı

4.1. Körpü bankın yaradılması barədə qərarda onun nizamnamə kapitalını təşkil edən səhmlərinin miqdarı və hər bir səhmin nominal dəyəri müəyyən edilir.

4.2. Körpü bankın səhmlərinin buraxılışı bu Qaydaların 3.1.1-ci və 3.1.2-ci yarımbəndlərində göstərilən sənədlər əsasında Palata tərəfindən dövlət qeydiyyatına alınır, bu barədə körpü banka qiymətli kağızların dövlət reyestrindən çıxarış təqdim olunur və körpü bankın səhmlərinin ilkin buraxılışı yerləşdirilmiş hesab edilir.

4.3. Körpü bankın səhmlərinin saxlanması və uçotu Milli Depozit Mərkəzi tərəfindən həyata keçirilir.

5. Ödəmə qabiliyyətini itirmiş bankın aktiv və öhdəliklərinin körpü banka köçürülməsi

5.1. Ödəmə qabiliyyətini itirmiş bankın aktiv və öhdəlikləri körpü banka bank lisenziyasının verilməsi tarixindən sonrakı 3 (üç) iş günü ərzində Palatanın İdarə Heyətinin qərarı ilə köçürülür.

5.2. Ödəmə qabiliyyətini itirmiş bankın müvəqqəti inzibatçısı ilə körpü bankın müvəqqəti inzibatçısı arasında ödəmə qabiliyyətini itirmiş bankın aktiv və öhdəliklərinin körpü banka köçürülməsinə dair müqavilə bağlanılır. Müqavilədə ən azı aşağıdakılar öz əksini tapmalıdır:

5.2.1. körpü banka köçürüləcək aktiv və öhdəliklərin siyahısı;

5.2.2. körpü bank tərəfindən ödəmə qabiliyyətini itirmiş bankın insan resurslarından, daşınmaz əmlakından və əsas vəsaitlərindən istifadəyə dair şərtlər.

5.3. Ödəmə qabiliyyətini itirmiş bankdan köçürülən öhdəliklərin ümumi dəyəri körpü banka köçürülən aktivlərin diskontlaşdırılmış dəyəri ilə premiumun cəmindən çox olmamalıdır.

5.4. Ödəmə qabiliyyətini itirmiş bankdan körpü banka öhdəliklər Qanunun 82-ci maddəsi ilə müəyyən edilmiş növbəlilik gözlənilməklə köçürülməlidir.

5.5. Ödəmə qabiliyyətini itirmiş bankın aşağıdakı aktivləri istisna olmaqla, digər aktivləri körpü banka köçürülür:

5.5.1. Palatanın normativ xarakterli aktları ilə müəyyən edilmiş qeyri-standart aktivlər;

5.5.2. ödəmə qabiliyyətini itirmiş bankın aidiyyəti şəxslərinə verilmiş kreditlər;

5.5.3. müvəqqəti inzibatçı tərəfindən idarə olunan və ya barəsində məcburi ləğv və ya müflis elan olunmasına dair qanuni qüvvəyə minmiş məhkəmə qərarı olan banklara verilmiş kreditlər;

5.5.4. balansdankənar maddələr.

6. Körpü bankın fəaliyyəti

6.1. Körpü bank fəaliyyətini Palata tərəfindən verilmiş bank lisenziyası əsasında həyata keçirir.

6.2. Qanunun 57-8.2-ci maddəsinə uyğun olaraq, Palata tərəfindən digər banklar üçün müəyyən edilmiş normativlər, habelə Azərbaycan Respublikasının Mərkəzi Bankı tərəfindən pul siyasətinin həyata keçirilməsi aləti kimi banklara tətbiq olunan məcburi ehtiyatların saxlanılması tələbi körpü banka şamil edilmir.

6.3. Körpü bank fəaliyyətini aşağıdakılar nəzərə alınmaqla Qanuna əsasən həyata keçirir:

6.3.1. körpü bank yeni depozitlər üzrə faiz dərəcələrini Palata ilə razılaşdırılmaqla müəyyən edir;

6.3.2. körpü bank sərbəst vəsaitlərini “Bank kapitalının və onun adekvatlığının hesablanması Qaydaları”nda müəyyən olunmuş 0 (sıfır) faizli risk qruplarına aid aktivlərə investisiya edə bilər;

6.3.3. ödəmə qabiliyyətini itirmiş bank tərəfindən müştərilərlə bağlanmış və körpü banka köçürülmüş müqavilələr üzrə kredit öhdəlikləri körpü bank tərəfindən yerinə yetirilə bilər;

6.3.4. körpü bank yeni kreditlər verə bilməz;

6.3.5. körpü bank kreditləri restrukturizasiya edə bilər.

6.4. Palata körpü bankın fəaliyyətinə Qanunun və Palatanın normativ xarakterli aktlarının tələblərinə uyğun olaraq nəzarət edir. Körpü bankın fəaliyyətində nöqsanlar aşkar edildikdə, habelə körpü bankın maliyyə vəziyyəti, o cümlədən aktivlərin keyfiyyəti pisləşdikdə Palata müvəqqəti inzibatçıya bununla əlaqədar tövsiyələr və yazılı şəkildə icrası məcburi göstərişlər verir.

7. Hesabatlılıq

7.1. Müvəqqəti inzibatçı körpü bankın fəaliyyətinə dair aylıq əsasda bu Qaydalara 1 saylı əlavədə müəyyən edilmiş sadələşmiş prudensial hesabatı hazırlayır və hesabat tarixindən sonrakı 7 (yeddi) iş günü ərzində Palataya təqdim edir.

7.2. Palata körpü bankdan onun fəaliyyəti ilə əlaqədar əlavə məlumat və hesabatlar tələb edə bilər.