Çinin “China Compulsory Certificate” (3C) sertifikatlaşdırma saytında “Xiaomi” şirkətinin buraxılışa hazırladığı yeni smartfon haqqında informasiya yerləşdirilib.
Yeni qurğunun bir neçə versiyası təqdim ediləcək. Məsələn, “M2004J7AC” və “M2004J7BC” kod adlı modifikasiyalar sadalanır. Söhbətin eyni qurğunun iki regional variantı barədə getdiyi ehtimal olunur.
2,6 QHs takt tezlikli dörd “ARM Cortex-A77” və 2,0 QHs takt tezlikli dörd “ARM Cortex-A55” nüvəsinin daxil olduğu “MediaTek Dimensity 1000” prosessorunun istifadə ediləcəyi smartfonların beşinci nəsil mobil rabitə şəbəkəsini (5G) dəstəkləyəcəyi bildirilir. Qrafikanı “ARM Mali-G77 MC9” sürətləndiricisi emal edəcək. İnteqrasiya edilmiş “5G” modemi məlumatların 4,7 Qbit/saniyə sürətlə ötürülməsini təmin edəcək.
Bildirilir ki, “M2004J7AC” smartfonu 22,5 vat gücündə sürətli enerjidoldurma akkumulyatoru ilə təchiz ediləcək. “M2004J7BC” modifikasiyası üçün 33 vatlıq enerjidoldurma dəstəyi nəzərdə tutulub.
Smartfonların “Redmi” markası ilə təqdim ediləcəyi gözlənilir. Yeni qurğuların təxmini qiyməti hələlik açıqlanmır.
©İctnews
