İmişlidə gilasın “Krım” növünün yığımına başlanılıb. Ağaclarda bol məhsul var, qiymət də münasibdir.
Şahverdili kənd sakini Nazim Həsənov bildirib ki, təsərrüfatı 20 sotdan ibarətdir və bağında 250 ədəd gilas ağacı var. Bu il bol məhsul yetişdiyini söyləyən bağban, qiymətlərin ucuz olduğunu deyir.
Təsərrüfatda əsasən 4 növ gilas ağacı əkilib. Onlardan “Öküz ürəyi” və “Zəngilan” növündən olan gilaslar daha tez yetişdiyi üçün yığım 3-5 gün əvvəl yekunlaşıb. Hər ağac orta hesabla 50-60 kiloqram məhsul verib.
Hazırda isə “Krım” gilasının yığımına başlanılıb. Bu növ gilas isə digərləri ilə müqayisədə daha uzun müddət saxlanıla bilməsi ilə seçilir. “Krım” növünnən olan ağacın hər birindən 50-100 kiloqram məhsul gözlənilir.
Nazim Həsənov deyir ki, qiymətlər bağbanlar üçün sərfəlidir: “Hazırda 1 kiloqram gilasın qiyməti 80 qəpik – 1 manat 20 qəpik arasında dəyişir. Bağın əsas giləmeyvəsi sayılan ağ gilas da demək olar ki, yetişib. Hazırda az miqdarda toplansa da, yaxın 10 gündə kütləvi yığımına başlanılacaq”.
Onun sözlərinə görə, ağ gilasdan mürəbbə bişirilməsi üçün daha çox istifadə edilir deyə, ona tələbat da çox olur.
