Rusiyanın “Rosatom” dövlət korporasiyası tərəfindən inşa edilən “Akkuyu” AES-in ilk enerji bloku 2023-cü ildə işə salınacaq.
Bunu Türkiyənin energetika və təbii sərvətlər nazirinin müavini Alparslan Bayraktar Sankt-Peterburq Beynəlxalq İqtisadi Forumu çərçivəsində keçirilən “Yaşıl enerji: yeni zamanın çağırışları” adlı paneldə deyib.
“Son 20 ildə Türkiyədə elektrik enerjisinə tələbat üç dəfə artıb və biz onun növbəti 20 ildə də artacağını gözləyirik. “Akkuyu” AES-in ilk enerji bloku gələn il istifadəyə veriləcək”, – nazir vurğulayıb.
Bayraktar qeyd edib ki, Paris iqlim sazişinin ratifikasiyasından sonra Türkiyə 2050-ci ilə qədər iqtisadiyyatını karbonsuzlaşdırmalı olacaq.
“Bu baxımdan biz təbii qaza və nüvə energetikasının inkişafına böyük əhəmiyyət veririk”, – deyə o əlavə edib.
“Akkuyu” AES Türkiyənin cənub sahilində yerləşən atom elektrik stansiyasıdır. O, VVER-1200 reaktorlu dörd enerji blokunun tikilib istifadəyə verilməsini özündə ehtiva edən Rusiya layihəsinə uyğun olaraq tikilir. Stansiyanın tikintisi ilə bağlı müqavilə 2010-cu ilin mayında imzalanıb. Bu gün “Akkuyu” elektrik stansiyasının tikintisi dünyanın ən böyük nüvə tikinti layihələrindən biridir. Tikintidə hər gün 13 mindən çox insan çalışır, 1000-dən çox tikinti texnikası və nəqliyyat vasitəsi inşaata cəlb olunur.
