Azərbaycanın iqtisadiyyat naziri Mikayıl Cabbarov XV Verona Avrasiya İqtisadi Forumunda bildirib ki, Rusiya Bakının əsas ticarət tərəfdaşlarından biridir, ölkələrin ticarət dövriyyəsi ildən-ilə artır. Rusiyanın İqtisadi İnkişaf Nazirliyinin rəhbəri Maksim Reşetnikov 2022-ci ilin ilk səkkiz ayında ticarətin 11.5% və ya 2.2 milyard dollar artdığını açıqlayıb.
Banker.az bu barədə “Kommersant”a istinadən xəbər verir.
“Biz əməkdaşlığı fəal şəkildə inkişaf etdiririk. 2022-ci ilin səkkiz ayının yekunlarına görə, ölkələrimiz arasında ticarət dövriyyəsi 11.5% artaraq 2.2 milyard ABŞ dolları təşkil edib. Bu, xüsusən də mövcud iqtisadi vəziyyəti nəzərə alsaq, yaxşı nəticədir”, – deyə Reşetnikov söyləyib.
Cənab Cabbarov əlavə edib ki, ölkələr arasında “reallaşdırılmamış potensial – nəqliyyat və logistika əlaqələri” mövcuddur. Onun sözlərinə görə, yükdaşımaların həcmini genişləndirmək üçün sərhəd-keçid infrastrukturunu yaxşılaşdırmaq, keçid qabiliyyətini artırmaq və gömrük işini optimallaşdırmaq lazımdır.
Avqustun sonunda Moskva və Bakı tranzit daşımaların asanlaşdırılması haqqında saziş imzalayıblar. İqtisadi İnkişaf Nazirliyindən bildirilib ki, Yaraq-Kazmalyar sərhəd-keçid məntəqəsinin modernləşdirilməsi ölkələr arasında ticarət dövriyyəsini artırmalıdır.
Oktyabr ayında Rusiya Prezidenti Vladimir Putin də ölkələr arasında ticarət dövriyyəsinin artdığını açıqlamışdı. O qeyd edib ki, Rusiya iqtisadi operatorları Azərbaycan iqtisadiyyatına 4.5 milyard dollar sərmayə qoyublar.
