Bu ilin yanvar-oktyabr aylarında Azərbaycan Gürcüstanın beş ən böyük ticarət tərəfdaşı siyahısına daxil olub.
Gürcüstanın Milli Statistika Xidmətinin dərc etdiyi ilkin məlumatlara əsasən, hesabat dövründə Azərbaycanla ticarət dövriyyəsi 1,1 milyard ABŞ dolları təşkil edib.
Gürcüstanın ən böyük ticarət tərəfdaşları siyahısına 2,3 milyard dollarla Türkiyə başçılıq edir. Daha sonra isə Rusiya (1,9 milyard dollar), Çin (1,5 milyard dollar), Azərbaycan (1,1 milyard dollar) və ABŞ (984 milyon dollar) gəlir.
Cari ilin ilk 10 ayında Çin 607,5 milyon dollarla ixracat baxımından Gürcüstanın ən böyük ticarət tərəfdaşı olub. Bu beşliyə Azərbaycan (541,7 milyon dollar), Rusiya (530,3 milyon dollar), Ermənistan (421,5 milyon dollar) və Türkiyə (379,2 milyon dollar) də daxildir.
İdxal baxımından Gürcüstanın ən böyük ticarət tərəfdaşları bunlardır: Türkiyə (1,9 milyard dollar), Rusiya (1,4 milyard dollar), Çin (920,9 milyon dollar), ABŞ (725,3 milyon dollar) və Azərbaycan (515,7 milyon dollar).
