Cümə axşamı, dekabrın 1-də “McKinsey” qlobal bank sənayesinin cari vəziyyəti ilə bağlı “Global Banking Annual Review” dərc edib. Hesabat müəllifləri qeyd edirlər ki, 2022-ci ildə banklar 14 il ərzində rekord rentabelliyə nail olacaq, kapitalın gəlirliliyi ilin sonuna kimi 11.5-12.5%-ə yüksələcək.
Banker.az bu barədə “Kommersant”a istinadən xəbər verir.
Bütövlükdə bank sektorunun gəliri, “McKinsey”ə görə, bu il təxminən 5.5% artaraq 6.5 trilyon dollar təşkil edəcək. Ən böyük bankların kapitalının adekvatlıq əmsalı da rekord yüksək səviyyədədir – 14-15%.
Eyni zamanda, hesabat müəllifləri qeyd edirlər ki, pandemiyanın nəticələrindən yenicə çıxmış banklar yeni problemlərlə üzləşiblər. “Dünyadakı banklar üçün 2022-ci ildə makroiqtisadi dəyişkənlik və geosiyasi təlatümlərin birləşməsi fərziyyələri alt-üst edib və on ildən çox nisbi sabitliyi tamamlayıb”, – deyə hesabatda bildirilir.
“McKinsey” analitikləri regionlar və sahələr üzrə əsas göstəricilərdə artan fərqləri qeyd edirlər. Belə ki, ABŞ, Kanada və Cənubi Afrika, Meksika və Hindistan da daxil olmaqla bir çox inkişaf etməkdə olan ölkələrin bankları üçün il əsasən uğurlu olmuşdur. Eyni zamanda, bir çox Avropa bankları mənfəət əldə edə bilmirlər. Sektorlar baxımından fintech xidmətləri və pərakəndə bankçılıq ənənəvi bankçılıq və sərvət idarəçiliyindən daha yaxşı performans göstərir.
