Azərbaycan Dövlət Neft Fondu (ARDNF) 2023-cü ilin birinci rübü üzrə investisiya portfelində qitələr üzrə baş verən dəyişikliyə aydınlıq gətirib.
ARDNF-dən bildirilib ki, bu ilin birinci rübündə Afrika qitəsi üzrə investisiyaların həcmində cüzi artım olmasına baxmayaraq, Fondun ümumi aktivlərində müşahidə olunan 9%-lıq artım səbəbindən sözügedən qitənin ümumi investisiya portfelində payı azalıb(cari pay 0.04%). Qeyd edilib ki, Avropa, Asiya və beynəlxalq təşkilatların portfeldəki paylarında faiz göstəricisi üzrə azalma da eyni səbəbdən baş verib.
Neft Fondu həmçinin, yatırımlarla bağlı əsas dəyişikliyin Şimali Amerika regionu ilə bağlı müşahidə olunduğunu açıqlayıb: “Belə ki, sözügedən region üzrə bu ilin ilk üç ayında investisiyalar 2.4% artıb. Şimali Amerika üzrə investisiyaların artımının mənbəyi mənfəət neftinin və qazın satışından əldə olunan gəlirlərin əsas hissəsinin borc öhdəlikləri və səhm alt portfellərinə yönləndirilməsidir. Səhm alt portfelinə yatırılmış hissənin, indeks bölgüsünə uyğun olaraq, 60%-i Şimali Amerikanın payına düşür. Əlavə olaraq, mənfəət neftinin və qazın satışından əldə olunan gəlirin bir hissəsinin ABŞ dövlət istiqrazlarına yatırılması da portfeldə Şimali Amerikanın payını artırıb. Artımın digər hissəsi isə bazarlarda baş verən dəyişikliklərlə əlaqədar qiymət artımına təsadüf edir”.
Fond əlavə edib ki, maliyyə bazarlarında baş verən qiymət dəyişiklikləri portfelin tərkibinə daxil olan maliyyə aktivlərinin qiymətlərinə təsir etdiyindən həmin aktivlər üzrə birbaşa yatırım və ya satış olmadan belə, onların portfeldə çəkisi dəyişə bilir.
