Çin yuanı ölkənin iqtisadi göstəricilərinin azalması fonunda ilin əvvəlindən bəri ən aşağı səviyyəyə düşüb. Bu gün, avqustun 14-də yuan 0.3% ucuzlaşaraq 1 dollar üçün 7.2816 olub. Sonuncu minimum iyun ayında 7.2857 səviyyəsində müəyyən edilib. Bütövlükdə il ərzində Çin valyutası təxminən 5% ucuzlaşıb ki, bu da yen və Cənubi Koreya vonundan sonra Asiyada ən pis göstəricidir, “Bloomberg” qeyd edir.
Agentliyin məlumatına görə, Çin səhmləri də azalır. Xüsusilə, CSI 300 1.8% azalıb. Çinin 10 illik istiqrazının gəlirliliyi bir baza bəndi geriləyərək 2.62%-ə düşüb və bu ilin ən aşağı səviyyəsi olan 2.59%-ə yaxınlaşıb.
İyulda Çinin ixracı iyunda 12.4% azaldıqdan sonra illik müqayisədə 14.5% azalaraq 281.8 milyard dollara düşüb. İdxal da iyunda 6.8% azaldıqdan sonra 12.4% azalaraq 201.2 milyard dollara enişi sürətləndirib. Nəticədə ölkənin ticarət profisiti 20.4% azalaraq 80.6 milyard dollara çatıb. Məlumatlar təkcə xarici tələbin zəifləməsini deyil, həm də daxili tələbata təzyiqin artdığını göstərir.
