Malayziya Fələstin-İsrail münaqişəsinin kəskinləşdiyi bir vaxtda İsrailin “ZIM” gəmiçilik şirkətinə liman infrastrukturundan istifadə etməyi qadağan edib, bu barədə “New Straits Times” məlumat yayıb.
Malayziyanın baş naziri Ənvər İbrahimin sözlərinə görə, ölkənin Nəqliyyat Nazirliyi şirkətin fəaliyyətinə daimi qadağa tətbiq etməklə təcili tədbirlər görmək niyyətindədir. “Eyni zamanda, hökumət İsrail bayrağı altında üzən gəmilərin ölkə limanlarına buraxılmaması barədə qərar qəbul edib. Bundan başqa, İsrailə gedən istənilən gəmilərə Malayziya limanlarında yük yükləmək qadağandır”, – baş nazir bildirib.
İbrahimin qeyd etdiyi kimi, qadağa İsrailin Malayziyada Fələstin xalqına qarşı davam edən qırğınlar və vəhşiliklər nəticəsində əsas humanitar prinsiplərin və beynəlxalq hüququn pozulması kimi qiymətləndirilən hərəkətlərinə birbaşa cavabdır.
Oktyabrın 7-də Fələstin HƏMAS hərəkatının döyüşcülərinin Qəzza zolağından İsrail ərazisinə soxulmasından sonra Yaxın Şərqdə vəziyyət kəskin şəkildə pisləşib. Bu, sərhədyanı qəsəbələrin sakinlərinin öldürülməsi və 200-dən çox, o cümlədən uşaqların girov götürülməsi ilə müşayiət olunub. Radikallar bu hücumu İsrail hakimiyyətinin Qüdsdəki Əl-Əqsa məscidinə qarşı hərəkətlərinə cavab adlandırıblar.
Fələstin Səhiyyə Nazirliyi daha əvvəl bildirmişdi ki, İsrail qüvvələrinin Qəzza zolağında keçirdiyi hərbi əməliyyatlar və İordan çayının qərb sahilində intensivləşən toqquşmalar səbəbindən 19 mindən çox insan həlak olub. Bildirilib ki, İsrail hücumlarının qurbanlarının 70%-i qadınlar və yeniyetmələrdir.
