®On ildən artıqdır ki, Bakı Fond Birjasının üzvü kimi fəaliyyətini uğurla davam etdirən “PAŞA Kapital İnvestisiya Şirkəti” QSC anderrayter kimi çıxış etdiyi daha bir emissiyanı uğurla tamamlayıb.
“Kapital Bank” tərəfindən buraxılan, hər birinin nominal dəyəri 100 (yüz) AZN, ümumi məbləği isə 50 000 000 (əlli milyon) AZN həcmində faizli, təmin edilməmiş, sənədsiz, adlı istiqrazların yerləşdirilməsi 10 iyun 2024-cü il tarixində uğurla başa çatmışdır.
“Bakı Fond Birjası” QSC-nin ticarət platformasında həyata keçirilmiş yerləşdirmədə hərrac zamanı 16 hüquqi və 26 fiziki olmaqla, 42 investor tərəfindən sifarişlər yerləşdirilmişdir. Yerləşdirmədə bir istiqraz üzrə qiymət 100 (yüz) AZN təklif edilməklə, 42 sifariş təqdim olunub. Sifarişlərin ümumi məbləği 96 091 685 (doxsan altı milyon doxsan bir min altı yüz səksən beş) AZN təşkil etmişdir.
Qeyd edək ki, yerləşdirilən istiqrazların 22.9%-i fiziki şəxslərin, 77.1%-i hüquqi şəxslərin payına düşüb.
Buraxılışın anderrayteri “PAŞA Kapital İnvestisiya Şirkəti” QSC-dir. İstiqrazları abunə yazılışı dövründə əldə bilməyən şəxslər təkrar bazardan əldə edə bilər. Əlavə olaraq bildirək ki, Kapital Bank istiqrazları üzrə faiz (kupon) ödənişləri 10 iyun 2024-cü il tarixindən hesablanılmağa başlanılıb və investorlara ildə günlərin sayı 360 (üç yüz altmış) olaraq götürülməklə hər 30 (otuz) təqvim gününün başa çatması tarixindən növbəti 3 (üç) iş günündən gec olmayaraq ödəniləcək.
