Qazaxıstan Milli Bankı kriptovalyutaların dövlət ehtiyatının formalaşdırılması ideyasını təsdiqləyib. Bu barədə Milli Bankın rəhbəri Timur Süleymenovun deputatın sorğusuna verdiyi rəsmi cavabda deyilir.
Hazırda belə ehtiyatın idarə edilməsi konsepsiyası, o cümlədən onun alternativ investisiyalarla işləyən Qazaxıstan Milli Bankının törəmə müəssisəsi əsasında yaradılması imkanları müzakirə olunur.
Sənədə əsasən, kriptovalyuta ehtiyatının mənbələri müsadirə edilmiş aktivlər və “dövlətin iştirakı ilə” mədənçilik nəticəsində əldə edilmiş kriptovalyuta ola bilər. Milli Bank şəffaflıq və davamlılıq tələbləri də daxil olmaqla beynəlxalq təcrübəyə uyğun olaraq ehtiyatın mərkəzləşdirilmiş və institusional şəkildə idarə olunmasının tərəfdarıdır.
Kriptovalyuta ehtiyatının formalaşdırılması mexanizmləri hüquq-mühafizə orqanları və müvafiq idarələrlə birgə hazırlanacaq. Layihənin həyata keçirilməsi üçün qanunvericiliyə düzəlişlər tələb oluna bilər.
