Danimarka kapitallı “Carlsberg Azerbaijan” tərəfindən istehsalat sahəsi icarə müqaviləsi əsasında istismar olunan “Bakı-Pivə” ASC 2024-cü ili 119 min manat xalis mənfəətlə başa vurub. Bu, 2023-cü ildə qeydə alınmış 291 min manatlıq xalis mənfəətlə müqayisədə 59.1% azalma deməkdir.
Banker.az xəbər verir ki, gəlirlər dəyişməz qalaraq hər iki ildə də 488.7 min manat təşkil edib. Lakin inzibati xərclərdə ciddi artım müşahidə olunub. 2024-cü ildə bu xərclər 339.5 min manat olub, halbuki 2023-cü ildə bu göstərici 124.8 min manat idi. İki il öncə isə illik icarə haqqı 459 min manat idi.
“Bakı-Pivə”nin cəmi aktivləri də artaraq 3 milyon 632 min manatdan 3 milyon 785 min manata yüksəlib. Aktivlərin artımı əsasən uzunmüddətli aktivlərin, xüsusilə debitor borclarının artması hesabına baş verib. Qısamüddətli aktivlər isə 708 min manatdan 634 min manata enib.
Kapital göstəricilərinə gəlincə, bölüşdürülməmiş mənfəət 458.6 min manatdan 577.8 min manata qalxıb. Nizamnamə kapitalı dəyişməz olaraq 2 milyon 471.4 min manat səviyyəsində qalıb. Şirkətin cəmi kapitalı 3 milyon 49 min manat təşkil edib. Cəmi öhdəliklər isə 736 min manata çataraq əvvəlki ilə nisbətən 4.7% artıb.
Keçmiş Xırdalan Pivə Zavodu olan “Bakı-Pivə” ASC-nin əmlakı “Carlsberg Azerbaijan” MMC-nin ( əvvəlki “Baltika Bakı” MMC) icarəsindədir. “Carlsberg Azerbaijan” şirkəti mənzil-qərargahı Danimarkanın paytaxtı Kopenhagen şəhərində yerləşən “Carlsberg Group”a məxsusdur. “Bakı Pivə” ASC-nin də səhm nəzarət paketi “Carlsberg Group” şirkətinə məxsusdur. Pivə istehsalı və satışı ilə “Carlsberg Azerbaijan” şirkəti məşğul olur. Bu səbəbdən gəlirin böyük hissəsi bu şirkət tərəfindən götürülür.
