Britaniyanın maliyyə tətbiqi “Revolut” Avropa İttifaqı ərazisində kriptovalyuta xidmətləri göstərmək üçün Kiprdə lisenziya aldığını bildirib.
Fintex şirkəti bildirib ki, onun müştəri bazasının 22%-i — 65 milyondan çox istifadəçi arasında ən azı 14 milyon nəfər — aktiv şəkildə kriptovalyuta ticarəti aparır. Bu istifadəçilər “müştərini tanı” (KYC) yoxlamasından keçib və tam şəkildə kriptovalyuta xidmətlərinə qoşulublar.
Kriptovalyuta ticarəti “Revolut”un inkişafında mühüm rol oynayıb. Şirkət ötən ay 75 milyard dollar dəyərində qiymətləndirmə ilə səhmlərin ikinci dərəcəli satışını başladıb.
Şirkətin illik hesabatına görə, kriptovalyuta ticarətində sənaye üzrə aktivliyin artması və “Revolut X” kriptobirjasının istifadəyə verilməsi nəticəsində “Revolut”un “Wealth” seqmentindən əldə etdiyi gəlir ötən il demək olar ki, üç dəfə artıb.
