“IBM” və “Riyadh Air” şirkətləri “IBM Think Riyadh 2025” konfransında böyük layihənin tamamlandığını elan ediblər. “Riyadh Air” dünyanın ilk süni intellekt (Sİ) bazasında sıfırdan qurulan aviaşirkəti olub. Şirkət köhnə sistemlərdən istifadə etmir və tamamilə yeni platformada işləyir.
Layihə üç il davam edib. “IBM Consulting” əsas koordinator kimi çıxış edib. Şirkət 59 istiqaməti və 60-dan çox tərəfdaşı birləşdirib. Onların arasında “Adobe”, “Apple”, “FLYR” və “Microsoft” da var. Layihənin idarə olunması üçün “IBM” Sİ əsaslı “IBM Consulting Advantage” platformasından istifadə edir.
Bildirilir ki, ilk sınaq reysləri artıq həyata keçirilir. Kommersiya uçuşlarının 2026-cı ilin əvvəlində başlaması planlaşdırılır. 2030-cu ilə qədər aviaşirkət 100-dən çox istiqamətə uçmağı və milyonlarla sərnişinə xidmət göstərməyi hədəfləyir.
“Riyadh Air”in maliyyə direktoru Adam Bukadida strategiyanın seçilməsinə izah gətirib. Onun sözlərinə görə, seçim aydın idi — ya köhnə texnologiyalarla sonuncu, ya da gələcəyin platformalarına keçid edən ilk aviaşirkət olmaq.
Sİ şirkətin bütün proseslərinin əsasına inteqrasiya edilib. Bu, həm əməkdaşların işini, həm də sərnişin təcrübəsini dəyişir. “Riyadh Air” bütün iş proseslərində generativ və agent əsaslı Sİ-dən istifadə etməyi düşünür.
Əməkdaşlar üçün Sİ agentləri əsasında şəxsi rəqəmsal platforma yaradılıb. Bu platforma HR ilə iş üçün vahid giriş nöqtəsi təqdim edir. Bort bələdçiləri və yerüstü personal Sİ əsaslı mobil tətbiqlərdən istifadə edəcəklər.
“IBM Consulting” bütün müəssisənin işini idarə edən sistemi tətbiq edib. Bu sistem təşkilat boyunca maliyyə, əməliyyat və kommersiya məlumatlarını birləşdirir. Sistem planlaşdırmanı, büdcəni, proqnozları və analitikanı avtomatlaşdırır. Bu isə qərar vermək üçün real vaxt məlumatları təmin edir.
Şirkət marşrutların gəlirliliyini və ümumi biznes fəaliyyətini vahid rəqəmsal baza vasitəsilə optimallaşdırır.
