“WhatsApp” mesencerinin yeni funksiyaları teqlərdən, mətn stikerlərindən və tədbirlər üçün xatırlatmalardan istifadə imkanları hesabına böyük qruplarda ünsiyyəti daha da sadələşdirib.
Belə ki, istifadəçi artıq qrup iştirakçıları siyahısında adının yanında göstəriləcək teqi seçə biləcək. Bu teq onun çatdakı rolunu, o cümlədən nə ilə məşğul olduğunu və nəyə cavabdeh olduğunu əks etdirəcək. Böyük qruplarda teqlər konkret tapşırığın həlli üçün kömək edə biləcək istifadəçini daha tez tapmağa imkan verəcək.
Bundan əlavə, istənilən sözü stikere çevirmək mümkün olacaq. Bunun üçün sadəcə stiker axtarışı bölməsində mətni daxil etmək kifayət edəcək.
Daha bir faydalı yenilik isə tədbirlər üçün xatırlatmalardır. Onları tədbirlərə dəvət olunan istifadəçilər üçün qrup çatında tədbir haqqında məlumat yaradılarkən və göndərilərkən qurmaq mümkün olacaq. Bu funksiya vacib iş görüşməsini və ya əyləncə tədbirini qaçırmamağa kömək edəcək.
