Avropa İttifaqı və Hindistan təxminən 20 il davam edən danışıqlardan sonra azad ticarət haqqında sazişi razılaşdırıblar. Avropa Komissiyasının sədri Ursula fon der Lyayenin rəhbərlik etdiyi Aİ nümayəndə heyəti Nyu-Dehliyə səfər edərək ikitərəfli sammit çərçivəsində Hindistanın Baş naziri Narendra Modi ilə görüşüb.
“Biz 2 milyard əhalini əhatə edən azad ticarət zonası yaratdıq və bundan hər iki tərəf faydalanacaq”, — deyə fon der Lyayen bildirib. O, sazişi “bütün dövrlərin ən böyük ticarət razılaşması” adlandırıb, Modi də eyni ifadəni işlədib.
“The Times of India”nın yazdığına görə, əldə olunan razılaşmaya əsasən Hindistan Avropadan idxal olunan meyvə şirələri, emal olunmuş ərzaq məhsulları, zeytun yağı, marqarin və digər bitki yağlarına tətbiq olunan rüsumları ləğv edəcək və bununla da Aİ-nin kənd təsərrüfatı ixracı üçün öz böyük bazarını açacaq. Bundan əlavə, hazırda 150%-ə çatan Avropa istehsalı güclü spirtli içkilərə tətbiq edilən rüsumlar 40%-ə endiriləcək.
Ümumilikdə, Aİ-dən ixrac olunan malların 96,6%-i tarif güzəştlərindən yararlanacaq.
Aİ həmçinin ekoloji əməkdaşlıq öhdəliyi götürüb və istixana qazı emissiyalarının azaldılması və “sənaye transformasiyası” üçün Hindistana 500 milyon avro ayıracaq.
Hindistanlı bir rəsmi “Reuters”ə bildirib ki, ölkədə sazişin 2026-cı il ərzində imzalanacağı gözlənilir.
“Reuters” yazır ki, Hindistanla saziş Aİ-nin ABŞ ilə münasibətlərdə yaranmış gərginlik fonunda mövqelərini möhkəmləndirmək meylini əks etdirir. Donald Tramp administrasiyasının siyasəti — Qrenlandiyanın alınması cəhdindən tutmuş Avropa tərəfdaşlarına qarşı rüsum tətbiqi hədələrinə qədər — ənənəvi Qərb ittifaqlarında gərginlik yaradır və Avropanı yeni strateji tərəfdaşlar axtarmağa sövq edir.
ABŞ-nin maliyyə naziri Skott Bessent sazişin imzalanması ərəfəsində Aİ-ni Hindistanla razılaşmaya görə sərt tənqid edib. “Biz Hindistana Rusiya nefti aldığına görə 25%-lik rüsum tətbiq etdik. Bilirsiniz ötən həftə nə baş verdi? Avropalılar Hindistanla ticarət sazişi imzaladılar. Avropalılar özlərinə qarşı müharibəni maliyyələşdirirlər”, — deyə o bildirib.
2025-ci ilin avqustunda Vaşinqton Hindistandan idxal olunan mallara əlavə 25%-lik rüsum tətbiq edib. Bu qərar Hindistanın “hazırda birbaşa və ya dolayısı ilə Rusiyadan neft idxal etməsi” ilə izah olunub. Həmin vaxt ümumi rüsum dərəcəsi 50%-ə çatmışdı.
