Çin Kommunist Partiyasının əsas nəşri olan “Qiushi” jurnalı Çin Xalq Respublikasının lideri Si Cinpinin “Çin xüsusiyyətlərinə malik maliyyə inkişaf yolu seçimi və maliyyə gücünün qurulması” adlı məqaləsini dərc edib. Məqalədə Si Cinpin maliyyə sahəsində ÇKP Mərkəzi Komitəsinin mərkəzləşdirilmiş və vahid rəhbərliyinin gücləndirilməsindən, həmçinin maliyyə sektorunda struktur islahatlarının dərinləşdirilməsinin vacibliyindən yazıb.
Jurnalın şərhində bildirilir ki, Si Cinpin zəruri maliyyə elementləri arasında beynəlxalq ticarətdə, investisiyalarda və valyuta bazarlarında geniş istifadə olunan, həmçinin qlobal ehtiyat valyutası statusuna malik güclü valyutanı əsas amil kimi göstərib.
“Financial Times” yazır ki, məqalədə Pekinə valyutasını dəstəkləmək üçün lazım olacaq geniş maliyyə bazasının formalaşdırılması yolları göstərilib. Qəzet vurğulayır ki, nəşr qlobal bazarlarda qeyri-müəyyənliyin artdığı bir vaxta təsadüf edib. Bu vəziyyət ABŞ dollarının zəifləməsi, Federal Ehtiyat Sistemində rəhbərliyin dəyişməsi və geosiyasi gərginliklərlə bağlıdır. FT-nin qeydinə görə, bunun nəticəsində mərkəzi banklar dollar aktivlərinə münasibətlərini yenidən nəzərdən keçirməyə başlayıblar.
2025-ci ilin üçüncü rübünə olan məlumata əsasən, dolların qlobal valyuta ehtiyatlarındakı payı təxminən 57% təşkil edib. Müqayisə üçün, bu göstərici 2000-ci ildə 71% idi. “International Monetary Fund” məlumatına görə, avronun payı təxminən 20% olub. FT əlavə edir ki, yuan 1,93% payla altıncı yeri tutub.
