“Walmart” 3 fevral tarixində tarixdə bazar dəyəri 1 trilyon dollara çatan ilk pərakəndə satış şirkəti olub. Buna səhmlərin son bir ildə təxminən 26% bahalaşması kömək edib və şirkəti “Nvidia” və “Alphabet” kimi texnologiya nəhəngləri ilə eyni sıraya çıxarıb.
“Walmart”ın yüksəlişi onun həm sərfəli qiymət və rahatlıq axtaran yüksək gəlirli müştəriləri cəlb etməsi, həm də aşağı gəlirli əsas alıcı bazasını qoruyub saxlaması ilə diqqət çəkir. Son on ildə şirkətin səhmləri 468% artıb və bu göstərici S&P 500 indeksinin 264%-lik artımını qabaqlayıb. Bu uğurun bir hissəsi rəqiblərin hələ təkrarlaya bilmədiyi “ikili strategiya” ilə bağlıdır.
Son beş ildə pərakəndə satış nəhəngi onlayn marketpleysini 500 milyondan çox məhsula qədər genişləndirib, bir saatlıq çatdırılmanı işə salıb, “Walmart+” xidmətini yaradaraq “Amazon Prime” ilə rəqabətə girib və dövriyyəsi 4 milyard dollardan çox olan reklam biznesi quraraq mənfəətliliyini artırıb.
Xüsusilə vacib məqam odur ki, “Walmart” süni intellektə erkən və aqressiv şəkildə yatırım edib. Şirkət təchizat zəncirinin avtomatlaşdırılmasına milyardlarla dollar sərmayə qoyaraq daha təzə məhsulların mövcudluğunu təmin edib, çatdırılmanı sürətləndirib və ehtiyatların proqnozlaşdırılması ilə məhsul axtarışını yaxşılaşdırıb. Arkanzas ştatının Bentonvil şəhərində yerləşən pərakəndəçi bu sayədə əməliyyat üstünlüyü əldə edib və LSEG-in hesablamalarına görə ABŞ-də müqayisə olunan mağazalar üzrə satış proqnozlarını ardıcıl 15 rüb üstələyib.
İnvestorların bu süni intellekt yatırımlarına olan optimizmi səhmlərin artımını daha da sürətləndirib, çünki istehlakçılar getdikcə daha çox onlayn ərzaq alış-verişinə üstünlük verirlər.
ABŞ-də ev təsərrüfatları, xüsusilə aşağı və orta gəlirli ailələr, davam edən inflyasiya və əmək bazarındakı artım tempinin zəifləməsi səbəbilə bir müddətdir artan maliyyə təzyiqi hiss edirlər. Tariflər və ABŞ hökumətinin son dayandırılması ilə bağlı qeyri-müəyyənlik də xərclərə mənfi təsir göstərib.
“Walmart” bazar kapitallaşması 1 trilyon dollardan yuxarı olan ABŞ şirkətlərinin siyahısına qoşulub. Bu siyahıya həmçinin “Nvidia” (4,5 trilyon dollar), “Alphabet” (4,1 trilyon dollar), “Apple” (3,9 trilyon dollar), “Microsoft” (3,1 trilyon dollar), “Amazon” (2,6 trilyon dollar), “Meta” (1,8 trilyon dollar), “Broadcom” (1,6 trilyon dollar), “Tesla” (1,6 trilyon dollar) və “Berkshire Hathaway” (1 trilyon dollar) daxildir.
