Çində süni intellekt sahəsində fəaliyyət göstərən şirkətlərin səhmləri bir neçə şirkətin təkmilləşdirilmiş süni intellekt modellərini təqdim etməsindən və siyasətçilərin bu texnologiyaların daha geniş tətbiqinə çağırış etməsindən sonra kəskin artıb. Bu barədə ticarət məlumatlarına istinadən CNBC yazır.
“Zhipu AI” şirkətinin Honq-Konq birjasında “Knowledge Atlas Technology” adı ilə ticarət olunan səhmləri 12 fevral ticarətinin sonunda 28,7% bahalaşıb, gün ərzində maksimum artım 41,8% olub. Şirkət yeni GLM-5 modelini təqdim edib və bildirir ki, o, proqramlaşdırma göstəricilərinə görə Claude Opus 4.5 səviyyəsinə yaxınlaşıb və bəzi testlərdə Gemini 3 Pro modelini üstələyir.
“MiniMax” səhmləri Honq-Konqda 14,6% yüksəlib — şirkət Sİ agentləri üçün geniş alətlər təqdim edən M2.5 modelini yeniləyib. “SenseTime” səhmləri 6,8% artıb, Şanxayda isə “UCloud” səhmləri 20% bahalaşıb.
Çinli tərtibatçılar süni intellekt sahəsində amerikalı rəqiblərə çatmağa çalışır və bu sahədə rəqabət güclənir. Yeni modellərin təqdimatı texnologiya ilə bağlı şirkətlərə investor marağını artırıb. Startap “DeepSeek” flaqman modelinin yenilənmiş versiyasını təqdim edib, “Ant Group” nitq, musiqi, səs effektləri və vizual kontent yarada bilən Flash-Omni 2.0 modelini buraxıb, “ByteDance” isə video generasiyası üçün Seedance 2.0 tətbiqini istifadəyə verib.
Çin Dövlət Şurasının Baş naziri Li Qiang 11 fevralda bildirib ki, ölkədə “Sİ-nin genişmiqyaslı və kommersiya tətbiqi” hərtərəfli şəkildə təşviq olunmalıdır. O, həmçinin texnologiyanın inkişafı üçün enerji və hesablama resurslarının koordinasiyasının gücləndirilməsinə və mütəxəssislər üçün şəraitin yaxşılaşdırılmasına çağırıb.
“JPMorgan”ın Asiya-Sakit okean üzrə baş bazar strateqi Tay Hui qeyd edib ki, investorlar artıq iri bulud və İİ infrastrukturu təminatçılarına selektiv yanaşır və borclanma hesabına böyüyən deyil, real mənfəət göstərən şirkətlərə üstünlük verirlər. “Futurum Group” analitiki Rolf Balk isə bildirib ki, Sİ sahəsində “balon” barədə danışmaq hələ tezdir, çünki bazarda güclü fundamental göstəricilərə malik çoxsaylı keyfiyyətli şirkətlər var.
