“Alibaba”nın səhmləri Honq-Konqda 3%-dən çox, digər iri Çin şirkətləri olan “Baidu” və BYD-nin səhmləri isə təxminən 1% ucuzlaşıb. “Bloomberg”in məlumatına görə, buna səbəb cümə günü Pentaqonun Çin ordusu ilə əməkdaşlıq edən şirkətlərin siyahısını bir neçə dəqiqəlik dərc etməsi olub. Həmin siyahıya bu İT nəhəngləri də daxil edilib.
Yenilənmiş siyahı ABŞ-nin Federal Reyestrində yerləşdirilsə də, demək olar ki, dərhal “geri götürülmüş” elan olunub və heç bir izahat verilmədən silinib. Siyahıya açıq şəkildə ticarət olunan üç şirkətlə yanaşı, router istehsalçısı “TP-Link” də daxil edilib. Eyni zamanda Pentaqon iki Çin yaddaş çipi istehsalçısını — “ChangXin Memory Technologies” və “Yangtze Memory Technologies” — siyahıdan çıxarıb.
“Bloomberg”in sorğusuna cavab olaraq ABŞ Müdafiə Nazirliyi bildirib ki, hazırda “elan ediləcək heç nə yoxdur”. Siyahının yenidən dərc olunub-olunmayacağı bəlli deyil.
“1260H” siyahısına daxil edilmə birbaşa hüquqi nəticələr doğurmur, lakin ABŞ investorları üçün xəbərdarlıq xarakteri daşıyır və daha sərt ticarət məhdudiyyətlərindən əvvəlki mərhələ ola bilər. Pentaqon bu siyahıdan getdikcə daha çox istifadə edərək şirkətlərin hərbi müqavilələr bağlamasını və ya tədqiqat maliyyəsi almasını məhdudlaşdıra bilər.
“Alibaba” və “Baidu” ittihamları qəti şəkildə rədd edərək məhkəmə iddiaları qaldıracaqlarını bildiriblər. “Biz Çin hərbi şirkəti deyilik və hərbi-mülki inteqrasiya strategiyasında iştirak etmirik”, — deyə “Alibaba” bəyan edib.
Analitiklərin fikrincə, siyahının Donald Trampın apreldə Çinə gözlənilən səfərindən bir neçə həftə əvvəl dərc edilməsi danışıqlar öncəsi güc nümayişi cəhdi ola bilər. Sənədin tezliklə silinməsi isə sammit ərəfəsində Pekinlə münasibətləri gərginləşdirməmək istəyinin üstünlük qazandığını göstərə bilər.
