Telegram-da fəaliyyət göstərən Wallet xidməti Özbəkistan istifadəçiləri üçün “ABŞ bazarı” adlı yeni bölmənin pilot istifadəyə verildiyini elan edib. Yeni servis istifadəçilərə Amerika şirkətlərinin tokenləşdirilmiş səhmlərini və birja investisiya fondlarını birbaşa messencer daxilində almağa, satmağa, saxlamağa və köçürməyə imkan verəcək. Pilot layihə 2026-cı ilin mart ayında başlayacaq və Milli Perspektiv Layihələr Agentliyinin nəzarəti altında bir ay davam edəcək.
Yeni bölmədə istifadəçilərə 60-dan çox tokenləşdirilmiş səhm və fond təqdim olunacaq. Bunlara Apple, Tesla, Netflix və Amazon kimi iri Amerika şirkətlərinin səhmləri, həmçinin ABŞ fond bazarının dinamikasını izləyən ETF-lər, o cümlədən S&P 500 indeksinə bağlı fondlar daxildir. Bütün əməliyyatlar əlavə hesab açmadan və ənənəvi investisiya platformalarından istifadə etmədən birbaşa Telegram daxilində həyata keçirilə biləcək.
İnvestisiya üçün minimal məbləğ 1 dollardan başlayacaq. İstifadəçilər səhmlərin fraksional hissələrini ala, həmçinin tokenləşdirilmiş aktivləri Telegram-dakı digər istifadəçilərə dərhal göndərə biləcəklər.
