Almaniyanın avtomobil nəhəngi Volkswagen 2025-ci ildə mənfəətin kəskin azalması barədə məlumat verib. Vergilərdən sonra şirkətin mənfəəti 44% azalaraq 12,4 milyard avrodan 6,9 milyard avroya düşüb. Şirkətin dövriyyəsi isə 0,8% azalaraq təxminən 322 milyard avro təşkil edib.
Volkswagen brendinin satışları il ərzində 4,73 milyon avtomobilə çatıb ki, bu da 2024-cü illə müqayisədə 1,4% azdır. Əsas azalma Çin və ABŞ bazarlarında qeydə alınıb: Çində yerli brendlərlə güclü rəqabət fonunda satışlar 8,4% azalaraq 2,02 milyon avtomobilə düşüb. ABŞ-da isə satışlar 8,2% azalaraq 544 min avtomobil təşkil edib; bu azalma qismən tətbiq olunan idxal rüsumları ilə əlaqələndirilir.
Əsas maliyyə göstəricilərinin azalması yalnız Volkswagen-ə aid deyil. Bir neçə digər Alman avtomobil konserni də mənfəət və dövriyyənin azalması barədə məlumat verib ki, bu da qlobal avtomobil bazarında ümumi tendensiyanı əks etdirir.
