ABŞ prezidenti Donald Trampın administrasiyası 1920-ci ildə qəbul edilmiş Cons qanununun (Jones Act) müvəqqəti dayandırılmasını nəzərdən keçirir. Bu qanuna görə ABŞ limanları arasında bütün yüklər yalnız ölkədə tikilmiş, ABŞ bayrağı altında üzən və amerikalı ekipaj tərəfindən idarə olunan gəmilərlə daşınmalıdır.
“Bloomberg” mənbələrə istinadən yazır ki, ABŞ limanları arasında neft, benzin, dizel yanacağı, mayeləşdirilmiş təbii qaz (LNG) və gübrələrin daşınması üçün qanundan 30 günlük istisna tətbiq etmək planlaşdırılır. Agentliyin məlumatına görə, bu addımın məqsədi İranda eskalasiya nəticəsində yaranmış enerji daşıyıcılarının qiymətindəki kəskin artımı sabitləşdirməkdir.
Ağ evin mətbuat katibi Karolin Levitt bildirib ki, qanundan müvəqqəti imtina milli müdafiə maraqları çərçivəsində razılaşdırılacaq və həyati əhəmiyyətli enerji daşıyıcıları ilə kənd təsərrüfatı məhsullarının tədarükünü təmin etmək məqsədi daşıyır.
“Bloomberg”in sorğu keçirdiyi ekspertlər hesab edir ki, Cons qanununun müvəqqəti dayandırılması yanacaqdoldurma məntəqələrində qiymətlərin azalmasına kömək edə bilər. Məsələn, ABŞ-nin Şərq sahilində benzinin qiyməti hər qallon üçün təxminən 10 sent ucuzlaşa bilər. Bununla belə, bəzi ekspertlər tədbirin effektivliyinə şübhə ilə yanaşır və ABŞ Konqresində gəmiqayırma sənayesi və onun tərəfdarları tərəfindən siyasi müqavimət yarana biləcəyini bildirirlər.
Enerji bazarındakı vəziyyəti sabitləşdirmək üçün ABŞ Maliyyə Nazirliyi bir ay müddətinə Rusiyaya 12 martadək tankerlərə yüklənmiş neft və neft məhsullarını satmağa icazə verib. Xammal tədarükündə yaranan çətinliklər Hörmüz boğazında gəmi hərəkətinə qoyulan məhdudiyyətlərlə bağlıdır. İran fevralın 28-də ABŞ və İsrailin hərbi əməliyyatından sonra bu marşrut üzrə gəmilərin keçidini bloklamağa başlayıb. Son həftələrdə Brent markalı neftin qiyməti iki dəfə 100 dollar/barel həddini keçib. Beynəlxalq Enerji Agentliyinin üzv ölkələri isə strateji ehtiyatlardan dünya bazarına 400 milyon barel neft çıxarmaq barədə razılığa gəliblər.
