İran Bəhreyn, İordaniya, Qətər, BƏƏ və Səudiyyə Ərəbistanından ABŞ və İsrailin müharibəsində iştiraklarına görə kompensasiya tələb edir. Bu barədə İranın BMT-dəki daimi nümayəndəsi Əmir Səid İravani bildirib.
“Bəhreyn, İordaniya, Qətər, Birləşmiş Ərəb Əmirlikləri və Səudiyyə Ərəbistanı qanunsuz hərəkətləri nəticəsində İrana vurulan maddi və mənəvi zərəri tam şəkildə kompensasiya etməlidir”, — deyə diplomat bildirib. Onun sözlərini “Tasnim” agentliyi sitat gətirir.
İravani qeyd edib ki, adı çəkilən ölkələr Vaşinqton və Təl-Əvivin tərəfində münaqişəyə qoşulmaqla İran qarşısında öhdəliklərini pozublar.
Mart ayında İranın BMT-dəki nümayəndəsi baş katib Antonio Quterreşə məktub ünvanlayaraq bir sıra Yaxın Şərq ölkələrini ABŞ-nin İrana qarşı hücumları üçün öz ərazilərindən istifadə etməyə icazə verməkdə ittiham edib. İravani həmçinin bildirib ki, Tehran Ukraynanı da Yaxın Şərqə pilotsuz uçuş aparatları üzrə mütəxəssislər göndərdiyinə görə hərbi əməliyyatların iştirakçısı hesab edir.
