ABŞ prezidenti Donald Tramp hesab edir ki, milyarder İlon Mask özünün kosmik şirkəti olan “SpaceX”in səhmlərini yeni doğulmuş uşaqlar üçün investisiya hesablarının açılmasını nəzərdə tutan “Tramp Hesabı” layihəsinə bağışlayacaq. O, bu barədə CNBC telekanalına müsahibəsində bildirib və əlavə edib ki, çip istehsalçısı “Micron Technology” və texnologiya şirkəti “Dell Technologies”in qurucusu Maykl Dell də səhmlərini ianə edəcəklərini vəd ediblər.
2025-ci ilin mayında Respublikaçılar Partiyası yeni doğulmuş amerikalılar üçün 1 000 dollar məbləğində investisiya hesablarının açılmasını təklif edib. Federal hökumət tərəfindən köçürülən vəsaitlər valideynlər və ya digər məsul şəxslər tərəfindən yalnız Amerika şirkətlərinin səhmlərinə yatırımla istifadə oluna biləcək. Bundan əlavə, valideynlər hər il bu hesaba 5 min dollara qədər əlavə vəsait köçürə biləcəklər.
Uşaq 18 yaşına çatana qədər hesaba çıxış əldə edə bilməyəcək. Daha sonra isə o, investisiyaları davam etdirə və ya yığılan vəsaiti təhsilinə, tibbi sığortasına və ya ilk mənzilinin alınmasına xərcləyə biləcək. Təşəbbüsün müəlliflərindən biri olan senator Ted Kruz bildirib ki, “bu, hər bir uşağı kapitalist edəcək”.
Bundan əvvəl cənab Tramp bəyan etmişdi ki, bu cür investisiya hesabları cari ilin 4 iyulunda – ABŞ-də Müstəqillik Günü və dövlətin yaradılmasının 250 illiyi münasibətilə istifadəyə veriləcək. 2025–2028-ci illər arasında doğulan bütün amerikalılar üçün belə hesablar açılacaq.
Valideynlər 2016-cı ildən sonra doğulmuş daha böyük uşaqlar üçün də hesab aça bilərlər. Lakin bu halda hesaba cəmi 250 dollar yatırılacaq və bu imkan yalnız nisbətən aztəminatlı bölgələrdə yaşayan uşaqlara şamil ediləcək. “Micron” isə bu proqram üçün 250 milyon dollar ianə edəcəyini açıqlayıb.
