Maliyyə xidmətləri sahəsində süni intellektdən istifadə texnologiyalarla tənzimləyici qurumlar arasında “silahlanma yarışına” çevrilib. Financial Times-ın verdiyi məlumata görə, Böyük Britaniyanın Maliyyə Davranışı və Tənzimlənməsi İdarəsinin (FCA) icraçı direktoru Şeldon Mills süni intellektin maliyyə xidmətlərinə təsiri ilə bağlı məruzə dərc edib.
Onun sözlərinə görə, nəzarət orqanları dəyişikliklərin “sürəti və miqyası” ilə ayaqlaşmaq, riskləri izləmək, müəyyən etmək və aradan qaldırmaq üçün özləri də süni intellekti geniş şəkildə tətbiq etməli olacaqlar. Mills hesab edir ki, neyroşəbəkələrin populyarlığı ilə bağlı əsas problem milyonlarla britaniyalının şəxsi maliyyələrini idarə etmək üçün artıq çat-botlardan istifadə etməsidir, halbuki bu sahə heç bir şəkildə tənzimlənmir. Onun məruzəsinə əsasən, ölkənin yetkin əhalisinin beşdə biri kredit və ya yığım qərarlarını tamamilə süni intellekt modellərinə etibar etməyə hazırdır ki, bu da ciddi risklər yaradır.
FCA nümayəndəsi Britaniya hökumətini ChatGPT, Claude və Gemini kimi iri dil modellərindən istifadənin maliyyə qaydalarına tabe olub-olmamasını təhlil etməyə çağırıb. Hazırda bu modellərin verdiyi tövsiyələr heç bir tənzimləməyə məruz qalmır. Bundan əlavə, o, növbəti 3–6 ay ərzində FCA-nın nəzarətindən kənarda fəaliyyət göstərən şirkətlərdə süni intellekt risklərinin yoxlanılmasını tövsiyə edib.
Bununla yanaşı, Mills etiraf edib ki, bu texnologiya az gəlirli insanların keyfiyyətli maliyyə məsləhətlərinə çıxışını təmin etməklə sektoru «demokratikləşdirə» bilər. Bu məqsədlə o, süni intellekt əsasında fəaliyyət göstərəcək pulsuz dövlət məsləhət xidmətinin yaradılmasını təklif edib.
İnsan müdaxiləsi olmadan maliyyə əməliyyatları həyata keçirə bilən avtonom süni intellekt agentlərinin meydana çıxmasını şərh edən top-menecer vurğulayıb ki, maliyyə şirkətlərinin rəhbərliyi maşınların fəaliyyətinə görə yenə də şəxsi məsuliyyət daşımalıdır. “Onların etdiklərinə görə konkret bir insan cavabdeh olmalıdır”, – deyə Şeldon Mills bildirib.
