Bakı Qızlar Universiteti və Naxçıvan Müəllimlər İnstitutu 2026-cı ildə magistraturaya qəbul aparmayacaq.
Dövlət İmtahan Mərkəzinin (DİM) rəsmi saytında yer alan statistikaya görə, Bakı Qızlar Universitetində 2025-ci il üzrə magistraturaya qəbul planı 50 yer olduğu halda, 2026-cı ildə bu göstərici 0-a enib. Naxçıvan Müəllimlər İnstitutunda isə qəbul planı 30 yerdən 0-a düşüb. Hər iki ali təhsil müəssisəsində qəbul planı üzrə azalma 100 faiz təşkil edib.
Ümumilikdə, 2026-cı ildə Azərbaycanın ali təhsil müəssisələri üzrə magistraturaya qəbul planı əvvəlki illə müqayisədə 840 yer və ya 4,82 faiz artıb.
Belə ki, 2025-ci ildə magistraturaya qəbul üzrə ümumi plan 16 848 yer olduğu halda, 2026-cı ildə bu göstərici 17 688 yerə çatıb.
Bununla yanaşı, dövlət sifarişi üzrə qəbul planında azalma qeydə alınıb. 2025-ci ildə dövlət sifarişi üzrə plan 7 084 yer olduğu halda, 2026-cı ildə bu rəqəm 7 022 yer təşkil edib. Beləliklə, dövlət sifarişi üzrə plan yerləri bir il ərzində 62 yer və ya 0,88 faiz azalıb.
DİM-in məlumatına əsasən, 2026-cı ildə keçirilən magistratura imtahanlarında ümumilikdə 27 859 bakalavr iştirak edib. 2025-ci ildə isə bu göstərici 26 241 nəfər olub.
Beləliklə, imtahan iştirakçılarının sayı bir il ərzində 1 618 nəfər və ya təxminən 6,2 faiz artıb.
2026-cı ildə imtahan iştirakçılarının orta balı 45,90 olub. Ötən il bu göstərici 48,26 bal təşkil edib. Bu isə orta nəticənin 2,36 bal və ya təxminən 4,9 faiz azalması deməkdir.
