Çinin süni intellekt sahəsində fəaliyyət göstərən Moonshot AI şirkəti 35 milyard dollar dəyərləndirmə ilə keçirilən maliyyələşdirmə raundunda 3,5 milyard dollar investisiya cəlb edib. Bu barədə vəziyyətlə tanış mənbələrə istinadən Bloomberg məlumat yayıb.
Agentliyin qeyd etdiyi kimi, bu məbləğ startapın əvvəlcə cəlb etməyi planlaşdırdığı 1–2 milyard dollardan xeyli çoxdur. Əsas investorlar arasında Çinin Milli Süni İntellekt İnvestisiya Fondu da yer alıb. Dövlətə məxsus bu fond DeepSeek şirkətini də maliyyələşdirir.
Bloomberg mənbələrinin sözlərinə görə, Moonshot artıq növbəti maliyyələşdirmə raundu üzrə danışıqlara başlayıb. Startap investisiya cəlb edilməzdən əvvəl dəyərinin 50 milyard dollara çatdırılmasını hədəfləyir.
Moonshot və dövlət investisiya fondunun nümayəndələri məsələ ilə bağlı şərh sorğularını cavablandırmayıblar.
İyul ayında Moonshot səhmdarlarını Honkonq Fond Birjasında listinqə çıxmaq niyyəti barədə məlumatlandırıb. Bloomberg-in məlumatına görə, şirkət növbəti altı ay ərzində IPO keçirə bilər.
Moonshot 2023-cü ilin əvvəlində Google və Meta şirkətlərinin keçmiş əməkdaşı Yan Jilin tərəfindən təsis edilib. Startapın çin dilində adı “Ayın qaranlıq tərəfi” (Dark Side of the Moon) mənasını verir və bu, şirkətin təsisçisinin sevdiyi Pink Floyd albomuna istinaddır.
Moonshot Çində süni intellekt sahəsinin liderlərindən biri hesab olunur və Alibaba Group Holding şirkətinin Qwen, MiniMax Group və Z.AI ilə eyni sırada dayanır.
