Meta şirkətinin səhmləri iyulun 30-da Nasdaq birjasında premarket ticarəti zamanı 9,4% ucuzlaşaraq minimum 530,54 dollara enib. Ticarət məlumatlarına görə, iyulun 29-da keçirilən əsas sessiyanın sonunda səhmlər 585,61 dollar səviyyəsində bağlanmışdı.
Bloomberg yazır ki, Meta investorları 2026-cı ilin üçüncü rübü üzrə gəlir proqnozu ilə məyus edib. Şirkət iyul–sentyabr aylarında gəlirin 61–64 mlrd. dollar olacağını gözləyir. Bu aralığın orta göstəricisi analitiklərin 63,2 mlrd. dollarlıq proqnozundan aşağıdır.
Meta eyni zamanda 2026-cı il üzrə kapital xərcləri proqnozunu da yeniləyib. Şirkət əvvəlki 125–145 mlrd. dollar diapazonunu 130–145 mlrd. dollar səviyyəsinə qaldırıb.
Şirkətin 2026-cı ilin ikinci rübündə gəliri illik müqayisədə 28% artaraq 60,8 mlrd. dollara çatıb. Səhm üzrə mənfəət 6,18 dollar təşkil edib. LSEG məlumatlarına əsasən, analitiklər orta hesabla 60,17 mlrd. dollar gəlir və 7,22 dollar səhm üzrə mənfəət gözləyirdilər.
CNBC-nin məlumatına görə, Meta-nın sərbəst pul axını ikinci rübdə 784 milyon dollara enərək 2022-ci ilin üçüncü rübündən bəri ən aşağı səviyyəyə düşüb. Şirkətin bütün tətbiqləri üzrə gündəlik aktiv istifadəçilərin (DAP) sayı 3,6 milyard olub ki, bu da Uoll-Stritin 3,61 milyard proqnozundan bir qədər aşağıdır.
İnvestorlar Meta-nın süni intellekt sahəsindəki inkişaflarını necə gəlirə çevirməyə çalışdığını yaxından izləyirlər. Şirkət iyulun əvvəlində Muse Spark 1.1 adlı süni intellekt modelini təqdim edib. Meta-nın süni intellekt bölməsinin rəhbəri Aleksandr Van modeli proqramlaşdırma üçün ən güclü həll adlandırıb və onun OpenAI və Anthropic məhsullarından daha ucuz olduğunu bildirib.
Meta-nın baş direktoru Mark Zukerberq bildirib ki, şirkət yaxın illərdə hesablama gücünün əhəmiyyətli hissəsini süni intellekt modellərinin öyrədilməsinə, əsas biznesin inkişafına, fərdi AI agentlərinin və yeni məhsulların yaradılmasına yönəldəcək. Onun sözlərinə görə, Meta iri korporativ müştərilərə xidmət biznesini də genişləndirməyi planlaşdırır.
