Ceff Bezos Amazon səhmlərinin qiyməti tarixi maksimuma yaxınlaşdıqdan sonra şirkətin 350 milyon dollar dəyərində səhmlərini satıb. Avqustun 3-də bulud bölməsinin güclü nəticələri fonunda Amazon-un bazar kapitallaşması tarixdə ilk dəfə 3 trilyon dolları ötüb, səhmlərin qiyməti isə pik nöqtədə 287 dollara çatıb. Bezos hələ də Amazon səhmlərinin 8%-dən çoxuna sahibdir.
Banker.az-ın məlumatına görə, Forbes-in qlobal milyarderlər siyahısında üçüncü yerdə olan Ceff Bezos təsis etdiyi Amazon şirkətinin səhmləri rekord səviyyəyə yüksəldikdən sonra təxminən 350 milyon dollarlıq səhm satıb. Bloomberg bu barədə açıqlanmış məlumatlara istinadən yazır. Forbes Real-Time Billionaires reytinqinin avqustun 6-na olan məlumatına görə, Bezosun sərvəti 279 milyard dollar qiymətləndirilir.
Bezos Amazon-un 1,2 milyon səhmini hər biri 286,4 dollara satıb. Milyarder daha əvvəl 15 milyon səhm satmağı planlaşdırdığını açıqlamışdı. Bloomberg-in hesablamasına görə, bu səhm paketinin dəyəri 4 milyard dolları ötür. Hazırkı əməliyyat Bezosun 2026-cı ildə həyata keçirdiyi ilk Amazon səhm satışı olub.
Səhmlərin bir hissəsini satdıqdan sonra da Bezos Amazon-un 8,16%-nə sahib olaraq qalır. Şirkətin nümayəndəsi Bloomberg-in şərh sorğusuna cavab verməyib.
Bazar ertəsi, avqustun 3-də Amazon-un bazar kapitallaşması tarixdə ilk dəfə 3 trilyon dolları keçib. Şirkətin səhmləri 2026-cı ilin ikinci rübündə bulud bölməsinin güclü nəticələri barədə hesabatın açıqlanmasından sonra kəskin bahalaşıb. Amazon səhmlərinin qiyməti pik nöqtədə 287,2 dollara yüksəlib, daha sonra isə artımın bir hissəsini itirib.
Bezos 2021-ci ildə Amazon-un rəhbəri vəzifəsindən ayrılıb, lakin şirkətin Direktorlar Şurasının sədri olaraq qalıb. Bloomberg-in hesablamasına görə, o, 2020-ci ildən bəri 38 milyard dollardan çox dəyərində Amazon səhmi satıb.
Səhm satışlarının həcminin artması milyarderin şəxsi xərclərinin yüksəlməsi ilə eyni dövrə təsadüf edib. Məsələn, Bezos 2023-cü ildə Floridaya köçdükdən sonra Mayamidə daşınmaz əmlaka 230 milyon dollardan çox, superyaxtaya isə təxminən 500 milyon dollar xərcləyib.
