Amazon-un təsisçisinin özünün də investisiya qoyduğu startap yeni maliyyələşdirmə raundunda vəsait cəlb edib və məxfi fəaliyyət rejimindən çıxıb.
Prometheus startapı yeni maliyyələşdirmə raundunda 12 milyard dollar cəlb edib. Bununla şirkətə yatırılan investisiyaların ümumi həcmi 18 milyard dollara çatıb, startap isə 41 milyard dollar dəyərində qiymətləndirilib. İnvestorlar arasında Ceff Bezosun özü, JPMorgan Chase, Goldman Sachs, BlackRock, DST Global və Arch Venture Partners var.
Şirkətin təsisçiləri Ceff Bezos və əvvəllər Google-un biotexnologiya bölməsi Verily-də çalışmış Vik Bacaydır. Hər ikisi həmsədr vəzifəsini tutur. Bezos üçün bu, 2021-ci ildə Amazon-un rəhbəri vəzifəsindən getdikdən sonra ilk rəhbər postudur.
Prometheus nə çatbotlar, nə də robotların hazırlanması ilə məşğuldur. Şirkətin məqsədi mürəkkəb fiziki obyektləri layihələndirə və onların istehsala qədər olan bütün mərhələsini idarə edə bilən sistem yaratmaqdır. Söhbət reaktiv mühərriklərdən və yarımkeçiricilərdən tutmuş avtomobillərə, kosmik aparatlara və tibbi avadanlıqlara qədər geniş çeşidli məhsullardan gedir. Şirkət belə sistemi “süni ümumi mühəndis” adlandırır.
Təsisçilərin sözlərinə görə, hazırda yüzlərlə mühəndisin 10 il ərzində apardığı hesablamaları gələcəkdə kiçik bir komanda cəmi bir ilə yerinə yetirə biləcək.
Şirkətdə bildirirlər ki, belə bir sistemin öyrədilməsi üçün lazım olan məlumatlar demək olar ki, mövcud deyil və onları müstəqil şəkildə toplamaq tələb olunur. Məhz buna görə kapitalın əhəmiyyətli hissəsi hesablama güclərinə və real dünyadan mühəndislik məlumatlarının toplanmasına yönəldilir.
Prometheus-un hələ hazır məhsulu yoxdur, sistem hazırlanma mərhələsindədir. Bezos ilk alətlərin nə vaxt istifadəyə veriləcəyini açıqlamır və yalnız “ilk versiyaların ortaya çıxacağını” bildirir.
Hazırda şirkətdə təxminən 150 nəfər çalışır. Prometheus-un ofisləri San-Fransisko, London və Sürixdə yerləşir.
