Google təchizatçılarına bildirib ki, 2027-ci ildən etibarən bütün Pixel smartfonlarını, simsiz qulaqlıqları və ağıllı saatları Çin xaricində istehsal etməyi planlaşdırır. Nikkei Asia bu barədə mənbələrə istinadən yazır.
Nəşrin məlumatına görə, şirkət geosiyasi gərginlik fonunda Çindən asılılığını azaltmaq istəyir. İstehsalın köçürülməsi Google-un flaqman Pixel modellərinin hazırlanması və buraxılışını Vyetnamda təşkil etməsindən sonra mümkün olub.
Google cihazlarının bir hissəsi Hindistanda da istehsal ediləcək. Şirkət son bir neçə il ərzində həm Vyetnamda, həm də Hindistanda istehsal güclərini artırıb.
Mənbələrin sözlərinə görə, Google yaddaş çipləri bazarındakı böhrana baxmayaraq, 2026-cı ildə Pixel tədarükünü illik müqayisədə 8–10% artırmağı planlaşdırır. Şirkət 2025-ci ildə təxminən 12 milyon cihaz tədarük edib.
Google hesab edir ki, smartfonlar Gemini süni intellekt xidmətlərinin yayılması üçün “mühüm kanal”a çevriləcək.
