HSBC və Standard Chartered Swift-in yeni blokçeyn əsaslı ortaq reyestrində ilk real tokenləşdirilmiş depozit əməliyyatını həyata keçiriblər.
Əməliyyat Swift-in iyul ayında yeni reyestrin ilkin istifadəyə hazır olduğunu açıqlamasından sonra baş tutub. Həmin vaxt altı qitədən 17 bankın tokenləşdirilmiş depozitlərdən istifadə etməklə 24/7 ödəniş imkanlarını və likvidliyin idarə olunmasının səmərəliliyini sınaqdan keçirməyə hazırlaşdığı bildirilmişdi. HSBC ilə Standard Chartered arasındakı əməliyyat Swift-in reyestrində həyata keçirilən ilk banklararası əməliyyat olub.
Əməliyyat zamanı Swift təhlükəsiz koordinasiya qatı kimi çıxış edib. Platforma yekun hesablaşma mövcud sistemlər vasitəsilə aparılmazdan əvvəl iki bank arasındakı öhdəliklərin uyğunlaşdırılmasına və qarşılıqlı əvəzləşdirilməsinə imkan verib.
Nəticədə formalaşan öhdəliklər həm HSBC-nin Tokenised Deposit Service (TDS) platformasında, həm də Standard Chartered-ın tokenləşdirilmiş depozit infrastrukturu üzərində tokenləşdirilmiş depozit öhdəlikləri kimi qeydə alınıb.
HSBC-nin rəqəmsal valyutalar üzrə rəhbəri Lyuis San bildirib ki, Standard Chartered ilə Swift vasitəsilə həyata keçirilən bu qarşılıqlı uyğunluq əməliyyatı tokenləşdirilmiş depozitlərin inkişafı baxımından mühüm mərhələdir.
“Bu, banklar tərəfindən buraxılan rəqəmsal pulun mövcud maliyyə ekosisteminin bütövlüyünü və tənzimləyici nəzarəti qorumaqla müxtəlif maliyyə institutları arasında qarşılıqlı uyğun şəkildə işləyə biləcəyini göstərir”, — o bildirib.
Sanın sözlərinə görə, korporativ müştərilər üçün əsas məqsəd real problemləri həll etməkdir. Buraya müxtəlif maliyyə institutları arasında likvidliyin qlobal miqyasda daha rahat hərəkət etdirilməsi, pul vəsaitlərinə görünürlüğün artırılması və ənənəvi transsərhəd əməliyyatlarla bağlı mürəkkəbliyin azaldılması daxildir.
