ABŞ borc probleminin həlli alətlərindən biri kimi dövlət borcunun silinməsi variantını ciddi şəkildə nəzərdən keçirməlidir. The New York Times bu barədə yazıb. Bir neçə gün əvvəl ABŞ-nin dövlət borcu rekord həddə çataraq 40 trilyon dolları ötüb.
Qəzetin köşə yazarı, pulun tarixinə həsr olunmuş “Almighty” kitabının müəllifi Pol Vinya qədim Mesopotamiyada tətbiq olunan amargi mexanizmini — borcların kütləvi şəkildə silinməsi praktikasını xatırladıb. Onun sözlərinə görə, təxminən 4,4 min il əvvəl Şumer hökmdarı Enmetena bir sıra borc öhdəliklərinin ləğv edildiyini elan edib, borc asılılığına düşmüş insanları azad edib və bəzi borclulara torpaqlarını geri qaytarıb.
Müəllif qeyd edir ki, qədim dövrlərdə bu cür tədbirlər borcların yığılması nəticəsində yarana biləcək iqtisadi və sosial qeyri-sabitliyin qarşısını almaq vasitəsi kimi istifadə olunurdu.
Bununla belə, məqalədə vurğulanır ki, qədim borc silinməsi praktikasını müasir dövrdə olduğu kimi təkrarlamaq mütləq deyil. Ancaq müəllif dövlət borcunun silinməsinə iqtisadi siyasətin yenidən nəzərdən keçirilməsi üçün mümkün alətlərdən biri kimi baxılmalı olduğunu düşünür.
“Çətin ki, müasir dövrdə amargi-nin birbaşa analoqunu görək. Lakin pulla münasibətimizi yenidən düşünmək üçün prinsiplər toplusu kimi onun tətbiq dairəsi kifayət qədər genişdir”, — məqalədə deyilir.
May ayında ABŞ-nin dövlət borcu İkinci Dünya müharibəsindən bəri ilk dəfə ölkə iqtisadiyyatının ölçüsünü üstələyib. Federal Ehtiyat Sisteminin sədri Cerom Pauellin sözlərinə görə, ABŞ dövlət borcunun hazırkı səviyyəsi hələ də idarəolunandır, lakin federal borclanmanın gələcək trayektoriyası narahatlıq doğurur.
Avqustun 19-da isə ABŞ-nin dövlət borcu tarixdə ilk dəfə 40 trilyon dollara çatıb. Təkcə son 10 il ərzində ölkənin ümumi borc yükü iki dəfə artıb.
