Stoxx Europe 600 indeksinə daxil olan şirkətlər üçüncü rübdə keçirilən konfrans zənglərində son on ilin rekord tezliyi ilə istilərdən, quraqlıqdan və çaylarda su səviyyəsinin aşağı düşməsindən danışmağa başlayıblar. Avqustda Qərbi Avropanın ən böyük və ən mühüm nəqliyyat arteriyalarından biri olan Reyn çayında suyun səviyyəsi tarixi minimumu yeniləyib. Bəzi şirkətlər artıq ekstremal hava şəraitinin maliyyə nəticələrinə mənfi təsir göstərdiyini bildirirlər. Bu isə aktiv idarəçilərini iqlim dəyişikliyi ilə bağlı risk və imkanları yenidən qiymətləndirməyə məcbur edir.
Pictet Asset Management iqlimə uyğunlaşmanı qarşıdakı on ilin ən mühüm investisiya mövzularından biri hesab edir. Bloomberg Intelligence-in qiymətləndirməsinə görə, ekstremal hava şəraitinin nəticələri ilə mübarizə növbəti on il ərzində dünya üzrə dövlətlərdən və bizneslərdən 20 trilyon dollardan çox xərc tələb edəcək. Bu isə bir sıra şirkətlər üçün böyük imkanlar yaradır.
Əsas benefisiarlar
Temperaturun yüksəlməsi və infrastrukturun dayanıqlığının artırılması zərurəti soyutma sistemlərinə, avtomatlaşdırmaya və elektrik şəbəkələrinin modernləşdirilməsinə tələbi dəstəkləyəcək. Buna görə də analitiklər iqlimə uyğunlaşmaya yönəldiləcək çoxtrilyonluq xərclərin əsas benefisiarları sırasında energetika və sənaye texnologiyaları sahəsində fəaliyyət göstərən Avropanın iri şirkətləri Schneider Electric, ABB və Siemens-i göstərirlər. Bu şirkətlər iqlim adaptasiyası üçün lazım olan bir növ “kürək və bel”ləri, yəni əsas avadanlıq və texnologiyaları təmin edirlər.
Eyni tendensiyalara daha spesifik investisiya kimi soyutma, ehtiyat enerji təchizatı və mikroşəbəkələr üçün həllər istehsal edən Alfa Laval və Wartsila çıxış edə bilər. Sənaye soyutma bazarının genişlənməsi, böyük ehtimalla, Munters səhmlərini də dəstəkləyəcək. Temperatura həssas məhsulların təhlükəsiz daşınmasına ehtiyacın artması isə soyuducu logistika operatoru Stef üçün əlavə imkanlar yaradır.
Ekspertlər bununla belə xəbərdarlıq edirlər ki, gözlənilən artımın bir hissəsi artıq şirkətlərin səhm qiymətlərinə daxil edilib. Məlumat mərkəzləri və süni intellektlə əlaqəli digər obyektlər tərəfindən yaranan əlavə tələb soyutma sistemləri istehsalçılarının səhmlərini bazarın ən bahalı qruplarından birinə çevirib.
Başqa kimlər faydalana bilər?
Reyn çayının dayazlaşması yük gəmilərini daşıdıqları yükün həcmini azaltmağa məcbur edir. Bu isə kimya, polad və sement istehsalçılarının nəqliyyat xərclərini əhəmiyyətli dərəcədə artırır. Almaniyanın BASF kimya konserni su səviyyəsindən asılılığı azaltmaq üçün az oturumlu tankerlərə investisiya edir. Bu gəmilər Norveçin Stolt-Nielsen gəmiçilik şirkəti tərəfindən idarə olunur.
Əgər digər sənaye şirkətləri də BASF-in nümunəsini təkrarlasa, belə gəmilərə tələb bir neçə dəfə arta bilər və Stolt-Nielsen bu tendensiyanın əsas benefisiarlarından birinə çevrilə bilər.
Uzunmüddətli perspektivdə fermerlər məhsulu istilərdən, quraqlıqdan və digər əlverişsiz hava şəraitindən qorumaq üçün yeni texnologiyalara ehtiyac duyacaqlar. Bayer, BASF, toxum istehsalçısı KWS Saat və kənd təsərrüfatı şirkəti Corteva artıq belə məhsullar üzərində işləyirlər.
Pictet həmçinin Danimarkanın Novonesis biotexnologiya şirkətinə diqqət yetirməyi məsləhət görür. Şirkət bitkilərin köklərinin daha dərinə inkişafını stimullaşdıran və onların nəmlik çatışmazlığına daha yaxşı dözməsinə kömək edən ferment istehsal edir.
Autsayderlər
Avadanlıqların soyudulması və ya su elektrik stansiyalarının işləməsi üçün sudan istifadə edən elektrik enerjisi istehsalçıları istehsalı azaltmağa məcbur olublar. Almaniyanın EnBW şirkəti artıq xəbərdarlıq edib ki, əlverişsiz hava şəraiti onun mənfəətini bir neçə milyon avro azalda bilər, lakin bunun hansı dövrə aid olduğu dəqiqləşdirilməyib.
Bu şəraitdə analitiklər diversifikasiya edilmiş enerji istehsalı mənbələrinə, alternativ logistika marşrutlarına və artan xərcləri istehlakçıların üzərinə ötürmək imkanına malik şirkətlərə üstünlük verməyi məsləhət görürlər.
