ABŞ-nin maliyyə naziri Skott Bessent Reuters agentliyinə müsahibəsində bildirib ki, qlobal disbalansı azaltmaq üçün G20 ölkələrini Çinlə ticarət şərtlərinə yenidən baxmağa çağıracaq.
O, həmçinin Pekinə iqtisadiyyatını ixracdan daxili istehlaka yönəltməsi üçün təzyiq göstərmək niyyətindədir. Bessent bildirib ki, ABŞ-nin Çinlə birbaşa ticarətdə mövqeyi “sürətlə yaxşılaşsa” da, Çindən hazırkı ixrac axını dayanıqlı deyil.
“Dünyanın 1,2 trilyon dollarlıq ticarət profisitinə malik Çinlə yaşaması mümkün deyil”, – Bessent deyib. “Çin iqtisadiyyatı kifayət qədər zəifdir və onlar bu problemi ixrac hesabına həll etməyə çalışırlar. Onlar iqtisadiyyatlarını yenidən balanslaşdırmalıdırlar”.
Bessentin Çinə qarşı koordinasiyalı ticarət reaksiyası təşəbbüsü ABŞ-ni tarif siyasətini yenidən qurmağa məcbur edən hüquqi maneələr fonunda ortaya çıxıb. Bu siyasət Çindən ABŞ-yə idxalı kəskin azaltsa da, Çin mallarının digər ölkələrə, xüsusilə Avropa və Latın Amerikasına axınının artmasına səbəb olub.
ABŞ yüksək gömrük rüsumları və avtomobillər də daxil olmaqla bəzi mallara birbaşa qadağalar vasitəsilə öz iqtisadiyyatını bir çox Çin məhsullarından təcrid edib. Bessent bildirib ki, ötən il digər sənayeləşmiş ölkələri Çin idxalının kəskin artımının yaradacağı təzyiq barədə xəbərdar edib və “indi onlar çox çətin seçim qarşısındadırlar”.
ABŞ-nin maliyyə naziri hesab edir ki, digər ölkələr Çini ixracdan asılılığı azaltmağa və uzun müddətdir zəif qalan daxili tələbi gücləndirməyə sövq etməlidirlər.
“Dünyanın qalan hissəsi Çinlə ticarət şərtlərinə yenidən baxmalı olacaq”, – Bessent bildirib.
