Azərbaycanda balıqçılıq sahəsində də kənd təsərrüfatının digər istiqamətlərində olduğu kimi dövlət dəstəyi mexanizmlərinin tətbiqi nəzərdə tutulur.
Bunu kənd təsərrüfatı nazirinin müavini İlhamə Qədimova yeni qəbul olunmuş “Toxumçuluq haqqında” və “Balıqçılıq haqqında” qanunlarla bağlı keçirilən mətbuat konfransında bildirib.
Onun sözlərinə görə, yeni qanunların əsas məqsədlərindən biri balıqçılıq və toxumçuluq sahəsində qanunvericiliyin müasir dövrün tələblərinə və beynəlxalq standartlara uyğunlaşdırılmasıdır.
Nazir müavini qeyd edib ki, hər iki sahədə əsas yeniliklərdən biri rəqəmsallaşmanın genişləndirilməsidir.
“Bu, həmin sahələrdə fəaliyyət göstərən subyektlərin qeydiyyatından başlayaraq dövlət nəzarətinin məsafədən həyata keçirilməsinə, eləcə də dövlət xidmətlərinə çıxışın rəqəmsal həllər vasitəsilə daha da asanlaşdırılmasına imkan verəcək”, – İlhamə Qədimova bildirib.
O əlavə edib ki, balıqçılıq artıq kənd təsərrüfatı fəaliyyətinin istiqamətlərindən biri kimi qiymətləndirilir və bu sahənin inkişafı, həmçinin ixrac potensialının artırılması qarşıya qoyulan əsas hədəflərdəndir.
İlhamə Qədimovanın sözlərinə görə, yeni qanunla balıqçılıq təsərrüfatlarının qeydiyyatının sadələşdirilməsi, uçot sisteminin təkmilləşdirilməsi və ölçmə vasitələrinin müasirləşdirilməsi də nəzərdə tutulur.
Nazir müavini vurğulayıb ki, balıqçılıq təsərrüfatlarının sayının və istehsalın artırılması ilə yanaşı, onların ətraf mühitə, biomüxtəlifliyə və su resurslarına mənfi təsir göstərmədən fəaliyyət göstərməsi də əsas tələblərdən olacaq.
İlhamə Qədimova bildirib ki, toxumçuluq sahəsində də qanunvericilik beynəlxalq normalara və müasir dövrün tələblərinə uyğunlaşdırılıb.
