Bloomberg-in keçirdiyi sorğunun nəticələrinə görə, avqust ayında OPEC ölkələrinin neft hasilatı kəskin azalıb və bununla da iki aylıq bərpa dövrü dayanıb. Agentlik yazır ki, əsas səbəb kartelin lideri Səudiyyə Ərəbistanının hər iki ixrac marşrutu üçün yaranan təhlükələr fonunda hasilatı məhdudlaşdırması olub.
Ötən ay OPEC ölkələrinin gündəlik neft tədarükü 900 min barel azalaraq orta hesabla 19,91 milyon barel təşkil edib. Səudiyyə Ərəbistanında hasilatın azalması gündəlik 1 milyon bareli keçib. Bu azalma İraq və Venesuelada hasilatın artması hesabına yalnız qismən kompensasiya olunub.
OPEC hasilatının azalması Vaşinqtonla Tehran arasında yenidən güclənən qarşıdurmanın nəticələrini göstərir. İyun və iyul aylarında istehsalçılar Fars körfəzindən neft ixracını davam etdirə bildikləri üçün hasilat qismən bərpa olunmuşdu. Lakin ABŞ ilə İran arasında altı aydır davam edən münaqişənin diplomatik həlli hələ də tapılmayıb.
Səudiyyə Ərəbistanının neft tədarükü eyni vaxtda iki istiqamətdən təzyiq altındadır. Hörmüz boğazında tankerlərə hücumların artması Fars körfəzindən neft daşımalarını pozur, Yəməndəki husilərin təhdidləri isə Ər-Riyadın ehtiyat ixrac marşrutu kimi istifadə etdiyi Qırmızı dəniz üzərindən daşımaları çətinləşdirir.
Husilərin məsuliyyəti öz üzərinə götürdüyü hücumlar Səudiyyə Ərəbistanını çərşənbə axşamı ölkənin cənubundakı bir sıra enerji obyektlərinin fəaliyyətini dayandırmağa məcbur edib.
Bu qeyri-sabitlik Londonda Brent markalı neft fyuçerslərinin bahalaşmasına səbəb olur və qiyməti bir barel üçün 100 dollar həddinə yaxınlaşdırır.
Bloomberg-in məlumatına görə, avqustda Səudiyyə Ərəbistanında xam neft hasilatı gündəlik 1,12 milyon barel azalaraq 6,98 milyon barelə düşüb. Bu, may ayından bəri ən aşağı göstəricidir.
Krallığın neft ixracı isə ilkin tanker izləmə məlumatlarına əsasən təxminən üçdə bir azalaraq gündəlik 3,03 milyon barelə enib.
Bu azalma İraqda hasilatın gündəlik 270 min barel artaraq orta hesabla 2,98 milyon barelə, Venesuelada isə 70 min barel artaraq 1,23 milyon barelə çatması ilə qismən kompensasiya edilib. Venesueladakı göstərici son yeddi ilin maksimumudur.
