Bu ilin əvvəlində ABŞ-nin proqram təminatı hazırlayan şirkətlərinin səhmləri demək olar ki, nəzərdən silinmişdi. İnvestorlar süni intellektin sürətli inkişafı fonunda bu biznes modelinin ciddi təzyiq altında qalacağını düşünürdülər. Bloomberg yazır ki, lakin sektorun qaçılmaz süqutu ilə bağlı proqnozlar xeyli şişirdilmiş görünür.
Birincisi, güclü maliyyə nəticələri proqram təminatı şirkətlərinin böyüməyə davam etdiyini göstərib. İkincisi, süni intellekt sahəsinin aparıcı şirkətləri ən güclü modellərin hazırlanma tempinin azaldılması ilə bağlı çağırışlar ediblər. Bu iki amil birlikdə investorların ən mənfi ssenarinin, ən azı yaxın perspektivdə, reallaşmayacağına inamını artırıb.
Nəticədə proqram təminatı sektoruna münasibət qısamüddətli dövrdə yaxşılaşmağa başlayıb. Bununla belə, süni intellektin meydana çıxması proqram təminatı bazarının uzunmüddətli perspektivlərini artıq əsaslı şəkildə dəyişmiş ola bilər.
Əhval-ruhiyyədəki dönüşü göstərən ən aydın siqnallardan biri daha əvvəl populyar olan ticarət strategiyasının dəyişməsidir. İnvestorlar bir müddət çip istehsalçılarının səhmlərinin bahalaşmasına mərc edir, eyni zamanda proqram təminatı şirkətlərinin səhmlərində eniş gözləyirdilər. İndi isə bu yanaşma əvvəlki qədər cəlbedici görünmür.
