Çin süni intellekt modelləri sürətlə istifadəçi toplasa da, onların yaradıcıları gəlir baxımından ABŞ rəqiblərindən xeyli geri qalır. Banker.az bunu CNBC-yə istinadla xəbər verir.
ABŞ-ın Çin iqtisadiyyatı üzrə araşdırma şirkəti “Rhodium Group”un hesablamasına görə, Çində fəaliyyət göstərən süni intellekt şirkətlərinin ümumi illik təkrarlanan gəliri “OpenAI” və “Anthropic”in birgə göstəricisinin təxminən 10%-nə bərabərdir.
Araşdırmada şirkətlər illik təkrarlanan gəlir — ARR göstəricisi üzrə müqayisə edilir. Bu göstərici son ayın gəlirinin 12-yə vurulması ilə hesablanır və biznesin cari tempini göstərir.
“Rhodium Group”un qiymətləndirməsinə əsasən, Çin AI şirkəti “DeepSeek”in ARR-i 500 milyon dollar, “MiniMax”ın 800 milyon dollar, “Moonshot”un 1 milyard dollar, “Z.ai”nin isə 1,8 milyard dollar təşkil edir.
Çinin texnologiya şirkəti “ByteDance” üçün bu göstərici 4 milyard dollar, e-ticarət və bulud xidmətləri nəhəngi “Alibaba” üçün isə 2,4 milyard dollar qiymətləndirilir. Müqayisə üçün, ABŞ AI şirkəti “OpenAI”də ARR 40 milyard dollar, ABŞ AI şirkəti “Anthropic”də isə 65 milyard dollardır.
“DeepSeek”in qiymətləndirilməsi gəlirindən 163 dəfə yüksəkdir
“Rhodium Group” bildirir ki, Çin startaplarının bazar qiymətləndirilməsi onların cari gəlirlərindən xeyli yüksəkdir. “Moonshot”un qiymətləndirilməsi ARR-dən təxminən 50 dəfə, “DeepSeek”in isə 163 dəfə çoxdur. Müqayisə üçün, “OpenAI”də bu multiplikator 34, “Anthropic”də 21-dir.
Çin modellərinin bir hissəsinin açıq mənbə kodlu olması monetizasiyanı çətinləşdirir. İstifadəçilər modelləri öz infrastrukturunda işlədə bildiyi üçün tərtibatçıya ödəniş etməyə bilər. ABŞ-ın qabaqcıl modellərinin əksəriyyəti isə qapalıdır və istifadəsi daha bahadır.
“Rhodium Group”un tərəfdaşı Loqan Rayt bildirib ki, maliyyələşmə imkanları məhdud qaldıqca Çin AI laboratoriyalarının davamlı şəkildə böyüməsi daha çətin olacaq.
Hesabata görə, Çin AI çipləri və server istehsalçılarına kapital yatırımlarının 60%-dən çoxu dövlətlə əlaqəli strukturlardan gəlib.
Bu arada “Anthropic”in gələn ay ABŞ-da birjaya çıxacağı, “OpenAI”nin IPO-nu gələn ilə saxladığı, “Moonshot”un Honq-Konqda məxfi şəkildə IPO müraciəti etdiyi, “DeepSeek”in də birjaya çıxmağa hazırlaşdığı bildirilir.
