Rusiyadan Gürcüstana fiziki şəxslərin rəsmi pul köçürmələri avqustda 5,1 milyon dollara düşərək 2004-cü ildən bəri ən aşağı səviyyəyə enib. Kəskin azalma Avropa İttifaqının Rusiyanın “Zolotaya Korona” pulköçürmə sisteminin operatoruna sanksiya tətbiq etməsindən sonra baş verib.
Banker.az Gürcüstan Milli Bankının məlumatlarına əsasən xəbər verir ki, Rusiyadan daxil olan köçürmələr iyuldakı 42 milyon dollardan avqustda 5,07 milyon dollara düşüb. İyunda bu göstərici 51,4 milyon dollar idi. Beləliklə, cəmi iki ay ərzində rəsmi köçürmələrin həcmi təxminən 10 dəfə azalıb. Avqust göstəricisi ötən ilin eyni ayı ilə müqayisədə 87,7% aşağıdır.
Rusiyanın biznes yönümlü RBK kanalı qeyd edir ki, 2022-ci ilin əvvəlindən Rusiyadan Gürcüstana aylıq köçürmələr indiyədək 25 milyon dollardan aşağı düşməmiş, 2022–2023-cü illərdə isə bəzi aylarda 300 milyon dolları ötmüşdü. Avqustdakı eniş nəticəsində Rusiya bir ay ərzində Gürcüstana ən çox pul göndərilən ölkələr sırasında üçüncü yerdən 11-ci yerə düşüb.
Gürcüstan Milli Bankı azalmanı birbaşa “Zolotaya Korona”ya tətbiq edilən məhdudiyyətlərlə əlaqələndirib. Avropa İttifaqının iyulda qəbul etdiyi 21-ci sanksiyalar paketi çərçivəsində sistemin operatoru və hesablaşma mərkəzi olan Rusiyanın “Platejnıy Tsentr” qeyri-bank kredit təşkilatı sanksiya siyahısına daxil edilib. Bundan sonra “Zolotaya Korona” Gürcüstan da daxil olmaqla bir sıra ölkələrə köçürmələri dayandırıb. “Civil Georgia” da iyulun 24-də sistemdə Gürcüstan istiqamətinin bağlandığını bildirmişdi.
Sanksiyaların miqyası “Zolotaya Korona”nın öz statistik göstəricilərində daha aydın görünür. “RBC”nin Gürcüstan Milli Bankının məlumatlarına əsaslanan hesablamasına görə, sistem vasitəsilə müxtəlif ölkələrdən Gürcüstana daxil olan köçürmələr iyuldakı 54,6 milyon dollardan avqustda cəmi 29,2 min dollara düşüb — təxminən 2 min dəfə azalıb. İyunda bu kanal üzrə köçürmələr 66 milyon dolları ötürdü. Milli Bank avqustda qeydə alınan cüzi məbləğin sanksiyalardan əvvəl göndərilmiş, lakin alıcılar tərəfindən daha sonra götürülmüş vəsaitlər olduğunu bildirib.
RBK-nın məlumatına görə, “Zolotaya Korona” daha əvvəl Gürcüstanda sürətli pulköçürmə sistemləri ilə aparılan əməliyyatların təxminən 15–20%-ni təmin edirdi. Avqustda Gürcüstandan Rusiya istiqamətində rəsmi köçürmələr də statistika tarixində ilk dəfə sıfıra düşüb. İyulda bu göstərici 3,7 milyon dollar, iyunda isə 4,3 milyon dollar olmuşdu.
Ümumilikdə, Gürcüstana xaricdən daxil olan pul köçürmələrinin həcmi avqustda illik müqayisədə 8,2% azalaraq 295,2 milyon dollara düşüb. Gürcüstandan xaricə göndərilən vəsait isə 5,8% azalaraq 33,6 milyon dollar təşkil edib.
